ძლიერი წვიმის შედეგად ბათუმში რამდენიმე ქუჩა დაიტბორა

2016-09-01 11:41:31, 1286 ნახვა

რეგიონი

ძლიერმა წვიმამ აჭარაში პრობლემები შექმნა.

დღეს ადიდებული მდინარე ბათუმი-ქობულეთი-ჩაქვის მონაკვეთზე ცენტრალურ გზაზე გადავიდა და რამდენიმე ქუჩა დატბორა.

როგორც "ექსპრესნიუსს" შპს "ბათუმის წყლის" პრეს-სამსახურში განუცხადეს, კომპანია საგანგებო რეჟიმში მუშაობს, მიმდინარეობს გაწმენდითი და ამოტუმბვითი სამუშაოები.

„წყლის მიწოდება ძველი ქსელის მომხმარებლებისთვის ამ დროისთვის შეზღუდულია. ცხელ ხაზზე შემოსული განცხადებების მიხედვით ჩვენი ბრიგადები სამუშაოებს ახორციელებენ“, - აცხადებენ „ბათუმის წყლის“ პრესსამსახურში.

გარდა ამისა, როგორც "ექსპრესნიუსს" ბათუმის მერის პრეს-სამსახურში განუცხადეს, რამდენიმე ქუჩაზე სანიაღვრე სისტემა უკვე გაკეთებულია და სტაბილური მდგომარეობაა.

"საღამოს გაკეთდება შემაჯამებელი განცხადება, თუ რა სამუშაოები ჩატარდა. 10-მდე გამოძახება დაფიქსირდა სახანძროში", - განაცხადეს ბათუმის მერიის პრეს-სამსახურში.

ბათუმში ამ დრომდე წვიმს. ამასთან, სარფისა და ქობულეთის სანაპიროებზე 4-ბალიანი შტორმი ფიქსირდება.

Patreon P მხარი დაუჭირე "ექსპრესნიუსს" →

ავტორი: ირაკლი მანაგაძე , ექსპრესნიუსის რეპორტიორი 2009 წლიდან