თავდაცვის სამინისტროსთან მოქალაქემ ვეტერანის მოწმობა დაწვა

2014-12-21 16:59:52, 6440 ნახვა

პოლიტიკა სამხედრო

თავდაცვის სამინისტროსთან მიმდინარე აქციაზე მოქალაქე არჩილ ხაჭაპურიძემ პროტესტის ნიშნად ვეტერანის მოწმობა დაწვა.

ხაჭაპურიძემ ამ ფორმით უკრაინაში დაღუპული ქართველ სამხედროსთან დაკავშირებით თავდაცვის სამინისტროს მიერ გავრცელებული განცხადება გააპროტესტა.

როგორც ვეტერანი ამბობს, აღნიშნული განცხადების გავრცელების შემდეგ, სამარცხვინოა ის თავდაცვის სამინისტროს მიერ გაცემულ მოწმობას ატარებდეს.

მან ასევე ვეტერანების პენსიაც გააპროტესტა და განაცხადა: „ერთ დროს სამშობლოსთვის მებრძოლი ადამიანები და ახლა ვეტერანად წოდებული ჯარისკაცები სამარცხვინო 22 ლარს არ უნდა იღებდნენ“.

თავდაცვის სამინისტროსთან, მინდია ჯანელიძის გადადგომის მოთხოვნით აქცია კვლავ მიმდინარეობს.

ადგილზე საპატრულო პოლიციაა მობილიზებული.

ცნობისთვის, ქართველი სამხედროს 31 წლის ალექსანდრე გრიგოლაშვილის უკრაინაში დაღუპვასთან დაკავშირებით გუშინ, თავდაცვის სამინისტრომ განცხადება გაავრცელა, სადაც უწყება, გრიგოლაშვილის დაღუპვის გამო მწუხარებას გამოთქვამს და ოჯახის წევრებს უსამძიმრებს. თუმცა, თავდაცვის უწყებამ ალექსანდრე გრიგოლაშვილის გარდაცვალების გამო პასუხიმსგებლობა ყოფილი ხელისუფლების წარმომადგენლებს დააკისრა.

„თავდაცვის სამინისტროს მხრიდან არაერთხელ აღინიშნა, რომ მსგავსი მოწოდებები არის უპასუხისმგებლო და ემსახურება საქართველოს შეიარაღებული ძალების ყოფილი და მოქმედი სამხედრო მოსამსახურეების შეცდომაში შეყვანას.

თავდაცვის სამინისტრო მოუწოდებს საქართველოს ყველა მოქალაქეს, არ აყვეს პროვოკაციას და სხვადასხვა შემოთავაზების სანაცვლოდ, არ ჩაიგდოს საკუთარი სიცოცხლე საფრთხეში.
აქვე აღვნიშნავთ, რომ ალექსანდრე გრიგოლაშვილი, 2007-2008 წლებში მსახურობდა საქართველოს შეიარაღებულ ძალებში. 2008 წლის დეკემბრიდან, კონტრაქტის შეწყვეტის საფუძველზე დათხოვნილ იქნა შეიარაღებული ძალებიდან”,-აცხადებენ თავდაცვის სამინისტროში.

Patreon P მხარი დაუჭირე "ექსპრესნიუსს" →

ავტორი: ირაკლი მანაგაძე , ექსპრესნიუსის რეპორტიორი 2009 წლიდან