გვარამია: იუსტიციის სამინისტროში ჩემი მიყვანილი უამრავი ადამიანია, რომლებიც კარგად ისმენენ ბესელიას საუბრებს

2016-06-09 19:38:00, 650 ნახვა

პოლიტიკა

"იუსტიციის სამინისტროში მუშაობს უამრავი ადამიანი, რომელიც ჩემი მიყვანილია იქ, რომლებსაც ყურებიც აქვთ და თვალებიც და ძალიან კარგად ხედავენ და ისმენენ ქალბატონი ბესელიას საუბრებს, მათ შორის ტუალეტებში" - ამის შესახებ სამაუწყებლო კომპანია "რუსთავი 2-ის" გენერალურმა დირექტორმა ნიკა გვარამიამ დღეს გამართულ ბრიფინგზე განაცხადა.

განცხადება გვარამიამ ეკა ბესელიას საპასუხოდ გააკეთა, რომელმაც [ეკა ბესელიამ ნიკა გვარამია] საკონსტიტუციო სასამართლოს პოლიტიკურ პროცესებში ჩართვაში დაადანაშაულა.

გვარამიას განცხადებით ეკა ბესელია ფარულ კომუნიკაციას აწარმოებს საკონსტიტუციო სასამართლოს მოსამართლე მერაბ ტურავასთან.

”საკონსტიტუციო სასამართლოს პოლიტიკაში რთავს ეკა ბესელია, როემლიც კანონებს იღებს მის წინააღმდეგ, პოლიტიკურად მოტივირებულ კანონებს. ის ფარულ კომუნიკაციას აწარმოებს მოსამართლე ტურავასთან. ეს პრაქტიკულად არც უარყო ბატონმა ტურავამ, რომელსაც არ შეიძლება საერთოდ კომუნიკაცია ჰქონდეს ბესელიასთან. ახსოვდეს ბესელიასაც და წულუკიანსაც, რომ იუსტიციის სამინისტროში მუშაობს უამრავი ადამიანი, რომელიც ჩემი მიყვანილია იქ, რომლებსაც ყურებიც აქვთ და თვალებიც და ძალიან კარგად ხედავენ და ისმენენ ქალბატონი ბესელიას საუბრებს, მათ შორის ტუალეტებში. ქალბატონმა ბესელიამ საქმეების პოლიტიზირებაში დაადანაშაულოს საკუთარი თავი, ვიდრე მას დაადანაშაულებს სხვა კომპეტენტური ორგანო მაშინ, როცა ხელისუფლება შეიცვლება და მაშინ, როდესაც ბატონი ტურავა იმდენს მოყვება ამის შესახებ, რომ პასტას ვერ გააგდებინებენ ხელიდან. მე რომ მოვედი ხელისუფლებაში, მაშინაც პასტით დაჯდა ბატონი ტურავა და იმდენი წერა, ძლივს გამოვგლიჯეთ ეს პასტა”, - განაცხადა გვარამიამ.