საქართველო საერთაშორისო რუკიდან გამქრალია - ამის შესახებ საქართველოს მეხუთე პრეზიდენტმა, სალომე ზურაბიშვილმა ინტერვიუში განაცხადა.

როგორც ზურაბიშვილი ამბობს, რუკის გარეთ დარჩენა რეგიონში და მის ფარგლებს გარეთ საქართველოს ისტორიული როლის დაკარგვას ნიშნავს. 

ზურაბიშვილმა საერთაშორისო მედიას პირდაპირ უთხრა, რომ საქართველო საერთაშორისო ურთიერთობების პასიურ ობიექტად იქცა. 

სამწუხაროდ, რაც შეეხება აშშ-სა და ევროპას, საქართველო საერთაშორისო რუკიდან გამქრალია და ეს დიდ შეშფოთებას იწვევს. რუკიდან გაქრობა საქართველოსთვის როგორც რეგიონში, ისე რეგიონის მიღმა, თავისი ისტორიული როლის გაქრობას ნიშნავს. რუსეთი კვლავ ჩვეულ სტილში იქცევა. ის აკონტროლებს არა მხოლოდ ხელისუფლებას, არამედ იმ კანონებსაც, რომლებსაც იღებენ. სანქციების გვერდის ავლაც უფრო ხშირი გახდა. ისინი ქართულ პორტს რუსული ნავთობისთვის იყენებენ, რაც საბოლოოდ ევროკავშირის მიერ იდენტიფიცირებულია. რუსეთი ბოლომდე არასდროს დაკმაყოფილდება, მაგრამ მან იპოვა ახალი სტრატეგია იმისა, თუ როგორ გააკონტროლოს სახელმწიფო უკრაინის მსგავსი ძვირადღირებული სამხედრო შეჭრის გარეშე“, - განაცხადა სალომე ზურაბიშვილმა.

კითხვაზე, რა სურს, რომ ევროპელმა მოკავშირეებმა მომდევნო ექვსი თვის განმავლობაში გააკეთონ, რათა საქართველო ევროპულ გზას დაუბრუნდეს, სალომე ზურაბიშვილის თქმით, „ქართველებს გათვითცნობიერებული აქვთ, რომ საკუთარ თავს უნდა დაეყრდნონ“.

„ვნახეთ, რომ ევროკავშირს აქვს ინსტრუმენტები და მზად არის ისინი ქართული სამოქალაქო საზოგადოების მხარდასაჭერად გამოიყენოს. თუმცა, არის დამატებით რაღაცები, რისი გაკეთებაც შესაძლებელია. საქართველოს ფარგლებს გარეთ უფრო მეტის გაკეთებაა შესაძლებელი. საქართველოში არსებული ვითარების უკეთ წარმოსაჩენად, მხარი უნდა დაუჭირონ იმ დიპლომატებს, რომლებმაც თანამდებობა ევროპულ გზაზე სვლის შეჩერებასთან დაკავშირებით პროტესტის გამო დატოვეს. შეიძლება ამ ადამიანებს ბრიუსელში ანალიტიკური ცენტრის შექმნაში დაეხმარონ, რათა საქართველოს ევროპული ინტეგრაციის სამომავლო პერსპექტივაზე იმუშაონ, როგორც კი ქვეყანა სწორ გზაზე დაბრუნდება. ასევე, მხარდაჭერა უნდა იყოს ჟურნალისტებისთვის, აქტივისტებისთვის და ახალგაზრდა სტუდენტებისთვის“, - აღნიშნა სალომე ზურაბიშვილმა.

ავტორი: ექსპრესნიუსი,

სოციალური ქსელები

ევროსაბჭოს საპარლამენტო ასამბლეამ საქართველოზე კრიტიკული რეზოლუცია მიიღო

კომერსანტი: კრემლში თქვეს, რომ ე.წ. სამხრეთ ოსეთის სტატუსის გადაწყვეტის დრო დადგა

გიორგი გახარია: ქართული ოცნება ოკუპანტ სახელმწიფოსთან კოლაბორაციონიზმის ღია დემონსტრირებას ახდენს

ედიტე ესტრელა: საქართველოში დემოკრატიული უკუსვლა გაგრძელდა, ასამბლეის არცერთი სასწრაფო რეკომენდაცია არ განხორციელებულა