2025-10-27 16:44:05, 902 ნახვა

---

ევროპა უკრაინის დასაფინანსებლად „B გეგმას“ ამუშავებს მას შემდეგ, რაც ბელგიამ უარი თქვა რუსეთის ცენტრალური ბანკის თანხების კონფისკაციაზე.

ბრიუსელში ევროკავშირის სამიტზე წარუმატებელი მოლაპარაკებების შემდეგ, ევროპელმა ლიდერებმა კიევის ფინანსური მხარდაჭერის ალტერნატიული მექანიზმების განხილვა დაიწყეს. Politico-ს ცნობით, რომელიც სამ ევროკავშირის დიპლომატს ეყრდნობა, ევროკომისია ამზადებს დოკუმენტს, რომელიც ითვალისწინებს წევრი სახელმწიფოების მიერ ათობით მილიარდი ევროს ოდენობის ერთობლივი ვალის გამოშვების შესაძლებლობას უკრაინის ეკონომიკის სტაბილურობის უზრუნველსაყოფად.

გეგმის გადახედვა გამოწვეული იყო ბელგიის უარით, მხარი დაეჭირა რუსეთის ცენტრალური ბანკის გაყინული აქტივების დაფინანსების წყაროდ გამოყენებისთვის. სანქცირებული ცენტრალური ბანკის სახსრების ძირითადი ნაწილი ამ ქვეყანაში ინახება და ამ თანხიდან დაახლოებით 140 მილიარდი ევროს გამოყოფა იგეგმებოდა. როგორც Bloomberg-მა აღნიშნა, ბრიუსელმა მოითხოვა მკაფიო გარანტიები, რომ ბელგია არ აიღებდა ფინანსურ პასუხისმგებლობას სესხთან დაკავშირებული ნებისმიერი რისკისთვის.

პოლიტიკოს ცნობით, ევროკავშირის დოკუმენტის პროექტი სამ სცენარს განიხილავს: ერთობლივი ვალის გამოშვებას, რუსული აქტივებით უზრუნველყოფილ ე.წ. „რეპარაციის სესხს“ და უკრაინის შემდგომი დაფინანსების შეწყვეტას. წყაროების თანახმად, მხოლოდ უნგრეთი უჭერს მხარს ამ უკანასკნელ ვარიანტს. ახალი სახსრების გარეშე, უკრაინას შესაძლოა 2026 წლის პირველი კვარტლის ბოლოსთვის სერიოზული ფინანსური დეფიციტი შეექმნას. გადაწყვეტილების მიღება 18 დეკემბერს, ევროპული საბჭოს სამიტამდეა დაგეგმილი.

ევროკავშირის რამდენიმე წევრი სახელმწიფოსთვის, რომლებიც უკვე ბიუჯეტის დეფიციტს განიცდიან, კოლექტიური ობლიგაციების გამოშვების იდეა უკიდურესად მგრძნობიარე ჩანს. ორი დიპლომატის თქმით, ევროკავშირის წევრების უმეტესობა კვლავ პრიორიტეტს ანიჭებს რუსული აქტივების გამოყენებას და ერთობლივი ვალის ვარიანტს უფრო ზეწოლის ინსტრუმენტად მიიჩნევს. ერთ-ერთმა მათგანმა აღნიშნა: „რატომ უნდა განვიხილოთ სხვა მიდგომები? რეპარაციული სესხი ერთადერთი რეალისტური მექანიზმია, რომელიც დარჩა“.

პოლიტიკოს თქმით, ევროკავშირს მსგავსი ფინანსური გამოწვევების წინაშე ადრეც დაუდგა, მაგრამ ამჟამინდელი სიტუაცია გაცილებით რთული ჩანს: აშშ-მ უარი თქვა დაფინანსების წინა დონეზე გაგრძელებაზე, ხოლო ევროპის უდიდესი ეკონომიკები შიდა სირთულეებს განიცდიან. რეპარაციული სესხის მექანიზმი ევროკავშირის ინსტიტუტებისთვის ახალ და შეუსწავლელ პრაქტიკად რჩება, ამიტომ, როგორც დიპლომატები ხაზს უსვამენ, „ტურბულენტობის პერიოდი მხოლოდ დასაწყისია“.

---

ავტორი: ექსპრესნიუსი,

---

დღის თემა

მთავარი თემა

ინტერვიუ - ექსკლუზივი