უკრაინაში საომარი მოქმედებების შეწყვეტის შემდეგ, ე.წ. „ნების კოალიცია“ (ან „მტკიცე კოალიცია“) იქ მრავალეროვნულ ძალებს განათავსებს. ამის შესახებ კოალიციის ლიდერების ერთობლივ განცხადებაშია ნათქვამი, რომელიც ბრიტანეთის მთავრობის პრესსამსახურმა გამოაქვეყნა.

აღნიშნულია, რომ დღეს გაიმართა „კოალიციის“ ლიდერების ვირტუალური შეხვედრა, რომელშიც, კერძოდ, საფრანგეთის პრეზიდენტი ემანუელ მაკრონი და ბრიტანეთის პრემიერ-მინისტრი კირ სტარმერი მონაწილეობდნენ, უკრაინის პრეზიდენტის, ვოლოდიმირ ზელენსკის მონაწილეობით.

ამ შეხვედრაზე განიხილეს „უკრაინის მხარდაჭერა და სამშვიდობო მოლაპარაკებების შემდეგი ნაბიჯები“ ტრამპსა და პუტინს შორის ალასკაში შეხვედრის შემდეგ. განცხადებაში ნათქვამია, რომ კოალიციის ლიდერებმა „დიდად დააფასეს პრეზიდენტ ტრამპის ვალდებულება, უზრუნველყოს უკრაინისთვის უსაფრთხოების გარანტიები“, რომლის პრაქტიკულ განხორციელებაშიც „ნების კოალიცია“ ჩაერთვება.

„მათ (შეხვედრის მონაწილეებმა) კიდევ ერთხელ დაადასტურეს მზადყოფნა, საომარი მოქმედებების შეწყვეტის შემდეგ დამხმარე ძალები განალაგონ, ასევე ხელი შეუწყონ უკრაინის ცისა და ზღვის უსაფრთხოების უზრუნველყოფას და აღადგინონ უკრაინის შეიარაღებული ძალები“, - ნათქვამია განცხადებაში.

 ხვალ ვაშინგტონში უნდა გაიმართოს მოლაპარაკებები უკრაინისა და აშშ-ის პრეზიდენტებს შორის, ევროპელი ლიდერების მონაწილეობით. ისინი განიხილავენ წინადადებებს, რომლებიც ტრამპმა რუსი დიქტატორისგან ალასკაში სამიტის დროს მოისმინა.

ოფიციალურად არავის დაუდასტურებია, თუ რა წინადადებები აქვს პუტინს. თუმცა, მედიაში მრავალი „გაჟონვა“ მიუთითებს, რომ რუსეთი მზადაა დაასრულოს თავისი „სამდღიანი SVO“, თუ უკრაინა დათმობს დონბასის დანარჩენ ნაწილს, ასევე უარს იტყვის ნატოში გაწევრიანების პერსპექტივაზე, რუსულს ოფიციალურ ენად აქცევს და ა.შ.

პრეზიდენტმა ზელენსკიმ ხაზგასმით აღნიშნა, რომ ტერიტორიების საკითხის განხილვა მხოლოდ პუტინთან პირადი შეხვედრის დროს შეიძლება. მედიის ცნობით, ასეთი შეხვედრა შეიძლება მომავალ პარასკევსაც გაიმართოს, თუმცა ოფიციალურად არავის გამოუცხადებია ამის შესახებ.

ავტორი: ექსპრესნიუსი,

სოციალური ქსელები

მაკრონმა სტარმერს მადლობა გადაუხადა და საფრანგეთსა და ბრიტანეთს შორის თანამშრომლობის გაგრძელება გამოაცხადა

ბრიტანეთის პრემიერ-მინისტრი თანამდებობიდან გადადგა

პოლონეთმა ზელენსკის მიერ დაბრუნებული „თეთრი არწივის ორდენის“ მიღება დაადასტურა

გვარამია ენმ-ზე - ხალხი ერთ პარტიაშია და ბრიფინგებით, სატელევიზიო ეთერებით და სტატუსებით ელაპარაკება ერთმანეთს და წყევლის და აგინებს