უკრაინის პრეზიდენტმა ვოლოდიმირ ზელენსკიმ განაცხადა, რომ აშშ-სა და რუსეთის ლიდერების ალასკაში შეხვედრის შემდეგ მას აშშ-ის პრეზიდენტ დონალდ ტრამპთან „ხანგრძლივი და შინაარსიანი“ საუბარი ჰქონდა. ამის შესახებ უკრაინის ლიდერმა Telegram-ზე განაცხადა.

მან აღნიშნა, რომ თავდაპირველად ტრამპთან პირისპირ ერთ საათზე მეტხანს ისაუბრა, შემდეგ კი საუბარში ევროპელი ლიდერებიც ჩაერთნენ. საერთო ჯამში, მათ საათ-ნახევარზე მეტი ისაუბრეს.

„უკრაინა კიდევ ერთხელ ადასტურებს, რომ მზადაა მშვიდობის გულისთვის მაქსიმალურად პროდუქტიულად იმუშაოს. პრეზიდენტმა ტრამპმა მაცნობა რუსეთის ლიდერთან შეხვედრის, საუბრის ძირითადი საკითხების შესახებ. მნიშვნელოვანია, რომ ამერიკის სიძლიერემ გავლენა მოახდინოს სიტუაციის განვითარებაზე“, - წერს ზელენსკი.

მან აღნიშნა, რომ უკრაინა მხარს უჭერს ტრამპის წინადადებას უკრაინას, ამერიკასა და რუსეთს შორის სამმხრივი შეხვედრის შესახებ, რადგან ძირითადი საკითხების განხილვა მხოლოდ ლიდერების დონეზეა შესაძლებელი.

ზელენსკიმ ასევე განაცხადა, რომ ტრამპის მოწვევით ვაშინგტონს ეწვევა.

„ორშაბათს, ვაშინგტონში, პრეზიდენტ ტრამპთან ერთად განვიხილავ მკვლელობების დასრულებისა და ომის დასრულების ყველა დეტალს. მადლიერი ვარ მოწვევისთვის.“

მან ასევე ხაზი გაუსვა ევროპელების ყველა ეტაპზე ჩართულობის მნიშვნელობას, რათა ამერიკასთან ერთად უზრუნველყოფილი იყოს საიმედო უსაფრთხოება.

„ჩვენ განვიხილეთ ამერიკული მხარის დადებითი სიგნალები უკრაინის უსაფრთხოების უზრუნველყოფაში მონაწილეობასთან დაკავშირებით. ჩვენ ვაგრძელებთ ჩვენი პოზიციების კოორდინაციას ყველა პარტნიორთან“, - წერს ზელენსკი.

„The Economist“-ის კორესპონდენტის, ოლივერ კეროლის ცნობით, ალასკაში გამართული სამიტის დროს ტრამპმა და პუტინმა ლიდერების სამმხრივ შეხვედრამდე „საჰაერო ზავის“ შესახებ წინასწარი შეთანხმებას მიაღწიეს.

თავის მხრივ, რესპუბლიკელმა სენატორმა ლინდსი გრეჰემმა იწინასწარმეტყველა, რომ რუსეთ-უკრაინის ომი შეიძლება შობამდე დასრულდეს, მაგრამ მხოლოდ იმ შემთხვევაში, თუ სამმხრივი შეხვედრა გაიმართება აშშ-ის პრეზიდენტ დონალდ ტრამპს, რუსეთის პრეზიდენტ ვლადიმერ პუტინსა და უკრაინის პრეზიდენტ ვოლოდიმირ ზელენსკის შორის.

ავტორი: ექსპრესნიუსი,

სოციალური ქსელები

მაკრონმა სტარმერს მადლობა გადაუხადა და საფრანგეთსა და ბრიტანეთს შორის თანამშრომლობის გაგრძელება გამოაცხადა

ბრიტანეთის პრემიერ-მინისტრი თანამდებობიდან გადადგა

პოლონეთმა ზელენსკის მიერ დაბრუნებული „თეთრი არწივის ორდენის“ მიღება დაადასტურა

გვარამია ენმ-ზე - ხალხი ერთ პარტიაშია და ბრიფინგებით, სატელევიზიო ეთერებით და სტატუსებით ელაპარაკება ერთმანეთს და წყევლის და აგინებს