მიმდინარე წლის 9 თებერვლიდან საქართველოში ელექტრონული ვიზის პორტალი ამოქმედდა.

როგორც „ექსპრესნიუსს“ საგარეო საქმეთა სამინისტროდან აცნობეს, მისი მეშვეობით ქვეყანაში ტურისტული და საქმიანი მიზნით მომავალ უცხოელებს შესაძლებლობა მიეცემათ საზღვარგარეთ საქართველოს საკონსულო დაწესებულებებში გამოცხადების გარეშე მიიღონ ელექტრონული ვიზა.

ვიზის მიღების მსურველმა პირმა ონლაინ განაცხადი უნდა დაარეგისტრიროს შემდეგ მისამართზე  www.evisa.gov.ge.

განაცხადის რეგისტრაციისას მომხმარებელი უნდა გაეცნოს დეტალურ ინფორმაციას ელექტრონული ვიზის მიღების წესებისა და პირობების შესახებ. დამატებითი ინფორმაციის მიღება კი შესაძლებელია ხშირად დასმული კითხვების გვერდზე.

ელექტრონულ პორტალზე სავიზო განაცხადის რეგისტრაციისას ვიზის მიღების მსურველი პირი  გადის 3 საფეხურს:  1. არეგისტრირებს სავიზო განაცხადს  2. ახორციელებს ონლაინ გადახდას 3. ბეჭდავს ელექტრონულ ვიზას.

რეგისტრაციის ბოლო ეტაპზე აპლიკაციაში მითითებულ ელექტრონულ ფოსტაზე აპლიკანტს მიუვა წერილი, სადაც კიდევ ერთხელ იქნება გაფრთხილება საქართველოში შემოსვლის პირობების თაობაზე და მითითებული იქნება გადახდის ბმული.

გადახდის განხორციელების შემდეგ, დადებითი პასუხის შემთხვევაში, მოქალაქე იგივე ელექტრონული ფოსტის მისამართზე მიიღებს ელექტრონულ ვიზას, რომელიც უნდა ამობეჭდოს და წარადგინოს საქართველოს სახელმწიფო საზღვრის გადმოკვეთისას მოქმედ სამგზავრო დოკუმენტთან ერთად.

ამა თუ იმ ქვეყნის მოქალაქეობიდან გამომდინარე შესაძლებელია იყოს განსხვავებული მოთხოვნები წარსადგენ დოკუმენტებთან და ვიზის მოქმედების ვადასთან დაკავშირებით,  აღნიშნული მოთხოვნების თაობაზე დეტალური ინფორმაციის მიღება შესაძლებელია რეგისტრაციის პროცესში, რასაც  მომხმარებელი აუცილებლად უნდა გაეცნოს.

აპლიკაციის შევსებისას ტექნიკური ხასიათის სირთულეების წარმოქმნის შემთხვევაში, ელექტრონული ვიზის მიღების მსურველ პირს შესაძლებლობა ექნება მიიღოს შესაბამისი დახმარება საკონსულო დეპარტამენტის ელექტრონული ფოსტის contact@evisa.gov.ge და ცხელი ხაზის მეშვეობით (2 94 50 50)

დეტალური ინფორმაცია ხელმისაწვდომია ელექტრონული ვიზის პორტალზე www.evisa.gov.ge.

სავიზო განაცხადის შევსება ინტერნეტ კავშირის არსებობის შემთხვევაში შესაძლებელია მსოფლიოს  ნებისმიერი წერტილიდან.  ვიზის მიღების ახალი სერვისი  ხელს შეუწყობს საქართველოში ტურისტების და ბიზნეს ვიზიტორების ნაკადის ზრდას.

აღსანიშნავია, რომ ელექტრონული ვიზის სერვისი აქტიურად გამოიყენება და დანერგილია ისეთ ქვეყნებში, როგორიცაა თურქეთი, ავსტრალია, ვიეტნამი სინგაპური, მეზობელი აზერბაიჯანი, მეზობელი სომხეთი, ბაჰრეინის სამეფო, კამბოჯის სამეფო და ა.შ.

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

სოციალური ქსელები

მაკრონმა სტარმერს მადლობა გადაუხადა და საფრანგეთსა და ბრიტანეთს შორის თანამშრომლობის გაგრძელება გამოაცხადა

ბრიტანეთის პრემიერ-მინისტრი თანამდებობიდან გადადგა

პოლონეთმა ზელენსკის მიერ დაბრუნებული „თეთრი არწივის ორდენის“ მიღება დაადასტურა

გვარამია ენმ-ზე - ხალხი ერთ პარტიაშია და ბრიფინგებით, სატელევიზიო ეთერებით და სტატუსებით ელაპარაკება ერთმანეთს და წყევლის და აგინებს