თბილისის საერთაშორისო აეროპორტში რუსული ავიაკომპანიის თვითმფრინავი დაეშვა [ვიდეო]

2023-05-19 13:38:55, 861 ნახვა

პოლიტიკა

რუსული ავიაკომპანია Azimuth Airlines-ის კუთვნილი თვითმფრინავი თბილისის საერთაშორისო აეროპორტში დაეშვა. რუსეთის ფედერაციის მიერ პირდაპირი ფრენების აღდგენის გადაწყვეტილების შემდეგ, ეს მოსკოვიდან პირველი რეისია.

პარალელურად, შოთა რუსთაველის სახელობის თბილისის საერთაშორისო აეროპორტში საპროტესტო აქცია მიმდინარეობს.

აქციამდე, „დროას“ ორგანიზებით, პირველი რუსული რეისის ჩამოფრენის გასაპროტესტებლად, აეროპორტისკენ მსვლელობა გაიმართა.

ცნობისთვის, მიმდინარე წლის 10 მაისს, რუსეთის პრეზიდენტმა, ვლადიმერ პუტინმა 2019 წლის 21 ივნისს საქართველოსთან პირდაპირი ფრენების შეწყვეტის შესახებ გაცემული ბრძანება გააუქმა. საქართველოს მოქალაქეებისთვის ასევე გაუქმდა სავიზო რეჟიმი. გადაწყვეტილება ძალაში 2023 წლის 15 მაისიდან შევიდა. კიდევ ერთი გადაწყვეტილება, რომლის შესახებაც რუსეთმა გამოაცხადა, „საქართველოში მოგზაურობისგან თავის შეკავების რეკომენდაციის“ გაუქმებას გულისხმობდა.