„ქართულ ოცნებას“ ევროკავშირთან დიალოგის უფრო მაღალ პოლიტიკურ დონეზე აყვანა სურს, ამტკიცებს რადიო „თავისუფლების“ ევროპული ბიუროს ხელმძღვანელი რიკარდ იოზვიაკი. „პირველი ტელევიზიისთვის“ მიცემულ ინტერვიუში იოზვიაკმა განაცხადა, რომ ევროკავშირი, ამავდროულად, თბილისთან პოლიტიკური დიალოგის განახლებით ნაკლებად ინტერესდება.

„სწორედ ეს სურს საქართველოს. მათ სურთ პოლიტიკური დიალოგი. მათ სურთ კონტაქტების განახლება ყველა პოლიტიკურ დონეზე. თუმცა, როგორც იცით, ევროკავშირი ამით განსაკუთრებით არ არის დაინტერესებული, რადგან აზრს ვერ ხედავს. ევროკავშირი ფაქტობრივად ბოიკოტს უცხადებს ბრიუსელში მაღალი რანგის ქართველ ოფიციალურ პირებთან შეხვედრებს.

შეიძლება ეს შეიცვალოს? შესაძლოა, ევროკავშირი საბოლოოდ შეხვდეს ქართულ მხარეს. მაგრამ რა მოხდება შემდეგ? რას განიხილავენ ისინი? შეხვედრებს განსახილველი თემა სჭირდება და არა უბრალოდ წრეზე სიარული. ამიტომ, არ გამოვრიცხავ ასეთი შეხვედრის შესაძლებლობას, მაგრამ მოხდება თუ არა იქ რაიმე მნიშვნელოვანი? არა მგონია. ვუახლოვდებით იმ წერტილს, სადაც ევროკავშირს რთული გადაწყვეტილებების მიღება მოუწევს? მეშინია, რომ კი...

ქართველები ამ საკითხის ესკალაციას ცდილობენ, ევროკავშირი კი მის უფრო დაბალ დონეზე მოგვარებას ცდილობს. ისინი სხვადასხვა ენაზე საუბრობენ. ეს არის შთაბეჭდილება, რომელიც ყოველთვის რჩება, როდესაც საქართველო და ევროკავშირი ხვდებიან ერთმანეთს. „და როგორ შეგვიძლია ამ სიტუაციიდან გამოსავლის პოვნა?“ „დარწმუნებული არ ვარ, რომ ეს საერთოდ შეიძლება გადაწყდეს“, - აღნიშნა მან.

ბრიუსელში 11 ივნისს გამართული შეხვედრის კომენტირებისას, იოზვიაკმა განაცხადა, რომ შეხვედრის დასრულების შემდეგ ევროკავშირის წარმომადგენლებმა დაასკვნეს, რომ „მათ დიდი პროგრესი არ მიუღწევიათ“.

„ეს რაღაც უხერხულ ცეკვას ჰგავს. ევროკავშირის წარმომადგენლები კითხულობენ: „რას აპირებთ ამა თუ იმ კანონით?“ ქართული მხარე პასუხობს: „ეს ტექნიკური შეხვედრაა და რაზეც თქვენ საუბრობთ, პოლიტიკური საკითხია. ჩვენ პოლიტიკოსები არ ვართ და არ შეგვიძლია კანონების შეცვლა, რადგან ეს პოლიტიკური გადაწყვეტილებაა“.

შემდეგ ქართული მხარე იმეორებს იმას, რაც, როგორც ჩანს, ამ შეხვედრაზე თქვა: რომ უცხოელი აგენტები ფინანსდებიან თბილისში არეულობის ორგანიზებისთვის, რომ ისინი თავს ესხმიან პოლიციას, რომ საპროტესტო აქციები ძალადობრივია და ამიტომ ეს კანონები აუცილებელია.

ამის შემდეგ, ევროკავშირი კვლავ ამბობს: შეცვალეთ კანონები. ქართული მხარე კი პასუხობს: ჩვენ ამის გაკეთება არ შეგვიძლია, რადგან აქ ტექნიკური და იურიდიული საკითხების განსახილველად ვართ. შემდეგ ისინი დამატებით განცხადებებს აკეთებენ ოპოზიციის, უცხოური დაფინანსების და სხვა პრობლემების შესახებ, რომლებიც, მათი აზრით, საქართველოში არსებობს.

რამდენადაც ვიცი, ქართული მხარე შეხვედრას საკმაოდ წარმატებულად მიიჩნევდა. ამავდროულად, ჩემი ინფორმაციით, ევროკავშირის წარმომადგენლებმა განაცხადეს: „ამ საკითხთან დაკავშირებით დიდ პროგრესს ვერ მივაღწიეთ“. სწორედ აქ ვართ ახლა. არსებითად, ეს იგივე პროცესის დასაწყისია“, - განაცხადა რიკარდ იოზვიაკმა.

ავტორი: ექსპრესნიუსი,

სოციალური ქსელები

კრიტიკის ცეცხლში მოყოლილი ისტორიაში ყველაზე ძვირადღირებული მსოფლიო ჩემპიონატი ფეხბურთში

აშშ-ის სასამართლომ ტრამპის 1.8 მილიარდი დოლარის ოდენობის კომპენსაციის ფონდი დაბლოკა

პაპუაშვილი - პარლამენტში პარტია „საქართველოსთვის“ სახელით მყოფი ხალხი უნდა მიხვდეს, რომ გაქცეული გახარია ამათ დასცინის

ბენზინის დეფიციტის გამო, რუსეთი თვითმფრინავებისთვის საწვავის პრობლემებია