უკრაინის პოლიტიკურ და სამხედრო ხელმძღვანელობაში საკადრო ცვლილებაა. უკრაინის პრეზიდენტმა, ვოლოდიმირ ზელენსკიმ, თავდაცვის მინისტრის პოსტიდან მიხაილო ფედოროვი გადააყენა, რომელიც აღნიშნულ პოზიციას სულ რაღაც ექვსი თვის განმავლობაში იკავებდა. გადაწყვეტილებას უკრაინულ საზოგადოებასა და სამხედრო წრეებში მწვავე რეაქცია, უკმაყოფილება და მასშტაბური პროტესტი მოჰყვა.

35 წლის ფედოროვმა, რომელიც მანამდე ციფრული ტრანსფორმაციის მინისტრი იყო და „დრონების არმიის“ პროექტებს ხელმძღვანელობდა, გადადგომა ოფიციალურ ტელეგრამ-არხზე დაადასტურა. მან აღნიშნა, რომ მისთვის დიდი პატივი იყო უკრაინელი ხალხის მსახურება და გამოაქვეყნა ვრცელი ანგარიში, სადაც ხაზი გაუსვა რუსეთისთვის Starlink-ის სისტემებზე წვდომის ბლოკირებას, სამხედროების ხელფასების ზრდას, სამობილიზაციო რეფორმებს, უკრაინული ბალისტიკური რაკეტის წარმატებულ გამოცდასა და დრონების მასობრივ წარმოებას.

„ხალხის მსახურის“ ფრაქციის დეპუტატებთან შეხვედრაზე ვოლოდიმირ ზელენსკიმ გადაყენების რამდენიმე მთავარი მიზეზი დასახელა. პრეზიდენტის თქმით, ფედოროვსა და შეიარაღებული ძალების მთავარსარდალს, ოლექსანდრ სირსკის შორის არსებობდა ფუნდამენტური უთანხმოება ომის წარმართვისა და არმიის რეფორმირების ხედვებში. ამასთან, თავდაცვის სამინისტრო შესყიდვებს გენერალურ შტაბთან საკმარისად არ ათანხმებდა, ხოლო ფედოროვმა ვერ უზრუნველყო ტერიტორიული დაკომპლექტების ცენტრების (სამხედრო კომისარიატების) მუშაობის სათანადო გარდაქმნა. ანალიტიკოსები და საპარლამენტო ინსაიდერები ასევე აღნიშნავენ, რომ ფედოროვმა, რომელიც თავდაცვის უწყებაში კორუფციულ სქემებსა და ჩაწყობილ ტენდერებს ებრძოდა, ბევრი მტერი გაიჩინა ტრადიციულ სამხედრო და პოლიტიკურ ელიტაში.

ფედოროვის გადაყენებამ უკრაინაში სოციალური უკმაყოფილება გამოიწვია. საზოგადოების დიდი ნაწილი მას მიიჩნევდა ერთადერთ რეფორმატორად, რომელმაც ფრონტზე ინოვაციებითა და დრონების მასობრივი გამოყენებით გარდატეხა შეიტანა. უკრაინის დედაქალაქში, უმაღლეს რადასთან და საპრეზიდენტო ადმინისტრაციასთან ათასობით ადამიანი გამოვიდა სლოგანებით: „Change or Perish“ („შეიცვალე ან დაიღუპე“) და „დააბრუნეთ ფედოროვი“. პროტესტს შეუერთდნენ სამხედრო სექტორის წარმომადგენლებიც — უკრაინის სამხედრო-საჰაერო ძალების მაღალჩინოსანმა მეთაურმა პროტესტის ნიშნად თანამდებობა დატოვა და ფედოროვის გადაყენებას „დიდი ბოროტება“ უწოდა, ხოლო ცნობილმა სამოქალაქო აქტივისტმა სერჰი სტერნენკომ განაცხადა, რომ რეფორმების განხორციელების საშუალება ბიუროკრატიამ არ მისცა.

უმაღლეს რადაში შესულ განაცხადში, თავდაცვის ახალ მინისტრად შინაგან საქმეთა მოქმედი მინისტრი, იგორ კლიმენკო სახელდება. ექსპერტების შეფასებით, კლიმენკოს დანიშვნა მიუთითებს იმაზე, რომ ზელენსკი აქცენტს ტექნოლოგიურ ინოვაციებზე მეტად მკაცრ დისციპლინასა და მობილიზაციის პროცესის გაკონტროლებაზე აკეთებს.

ავტორი: ექსპრესნიუსი,

სოციალური ქსელები

ირაკლი კობახიძე – საქართველო და თურქმენეთი სტაბილური და სანდო სავაჭრო პარტნიორები არიან

ახალქალაქში, საკუთარ სახლში, მამაკაცის ცხედარი იპოვეს

ვაკის პარკის შადრევნის საქმეზე დაკავებული ლაშა ფურცხვანიძე ციხიდან ვადაზე ადრე გაათავისუფლეს

უკრაინის რადამ ახალ პრემიერ-მინისტრად სერგეი კორეცკი დაამტკიცა