ევროპარლამენტმა 436 ხმით 145-ის წინააღმდეგ მიიღო რიგით მეორე კრიტიკული ანგარიში საქართველოს, როგორც კანდიდატი ქვეყნის შესახებ. ევროპარლამენტის საგარეო საქმეთა კომიტეტის მიერ მომზადებული დოკუმენტი ეყრდნობა ევროკომისიის შეფასებებს და აცხადებს, რომ მმართველი პარტიის პოლიტიკის გამო, საქართველოს ევროინტეგრაციის პროცესი 2024 წლიდან დე ფაქტო შეჩერებულია.

მიღებული რეზოლუციის ძირითადი ფაქტები და მოთხოვნები:

• პერსონალური სანქციები: ევროპარლამენტი ევროკავშირსა და წევრ სახელმწიფოებს მოუწოდებს, დაუყოვნებლივ დააწესონ მიზანმიმართული პერსონალური სანქციები ბიძინა ივანიშვილის, მისი ოჯახის წევრებისა და კომპანიების წინააღმდეგ და გაყინონ მისი აქტივები. დოკუმენტი ასევე ითხოვს სანქციებს „ქართული ოცნების“ ლიდერების, მოსამართლეებისა და პროკურორების მიმართ. ევროკავშირის დონეზე ერთსულოვნების არარსებობის შემთხვევაში, პარლამენტი წევრ ქვეყნებს ეროვნულ დონეზე სანქციების დაწესებისკენ მოუწოდებს.
• ურთიერთობების შეზღუდვა და ლეგიტიმურობა: ევროპარლამენტი მოუწოდებს ევროკავშირის წარმომადგენლებს, თავი შეიკავონ ხელისუფლების წარმომადგენლებთან შეხვედრებისგან და აცხადებს, რომ არ აღიარებს 2024 წლის ოქტომბრის არჩევნების შემდეგ ჩამოყალიბებული პარლამენტისა და მის მიერ დანიშნული პრეზიდენტის ლეგიტიმურობას.
• სავიზო რეჟიმი: ანგარიშში აღნიშნულია, რომ 2026 წლის 6 მარტს ევროკომისიამ უკვე შეუჩერა უვიზო მიმოსვლა საქართველოს დიპლომატიური და სამსახურებრივი პასპორტების მფლობელებს 2027 წლის მარტამდე, თუმცა რიგითი მოქალაქეებისთვის უვიზო რეჟიმი ძალაში რჩება.
• კანონმდებლობა და რეპრესიები: დოკუმენტი გმობს 2026 წლის მარტში „გრანტების შესახებ“ კანონში შესულ ცვლილებებს, რომელიც უცხოური დაფინანსების უნებართვო მიღებაზე 6 წლამდე პატიმრობას ითვალისწინებს. რეზოლუცია ითხოვს ყველა პოლიტპატიმრის, მათ შორის მიხეილ სააკაშვილისა და საპარლამენტო კომისიაში გამოუცხადებლობისთვის დაკავებული ოპოზიციონერების გათავისუფლებას. სამოქალაქო სექტორზე დაყრდნობით, ანგარიშში აღნიშნულია 48 პოლიტპატიმარი და 68 წინასწარ პატიმრობაში მყოფი პირი.
• სანქციების გვერდის ავლით რუსეთთან ვაჭრობა: რეზოლუციაში გამოხატულია შეშფოთება, რომ საქართველო მოქმედებს როგორც ტრანზიტული ქვეყანა რუსეთისთვის სანქცირებული და ორმაგი დანიშნულების საქონლის მისაწოდებლად. აღნიშნულია, რომ საქართველოში ამჟამად მოქმედებს რუსეთის მოქალაქეების საკუთრებაში არსებული 40 000-მდე კომპანია.
• აქციები და ძალადობა: დოკუმენტში ხაზგასმულია, რომ 2024 წლის ნოემბრიდან, მას შემდეგ რაც მთავრობამ ევროინტეგრაციის მოლაპარაკებები 2028 წლამდე შეაჩერა, ქვეყანაში უწყვეტი პროტესტი მიმდინარეობს. ევროპარლამენტი გმობს დემონსტრანტებისა და მედიის წინააღმდეგ ძალადობას და მიუთითებს ეუთოს „მოსკოვის მექანიზმის“ მოხსენებაზე, რომლის მიხედვითაც დაკავებულთა მიმართ მოპყრობამ ზოგ შემთხვევაში წამების ზღვარს მიაღწია.
•  

ავტორი: ექსპრესნიუსი,

სოციალური ქსელები

პავლოგრადზე რუსული თავდასხმის შედეგად 8 წლის გოგონა დაიღუპა

ფოდოროვი - უკრაინა მიიღებს შორ მანძილზე მოქმედ არტილერიას, ფრთოსან რაკეტებს და დრონების მხარდაჭერას

ევროკავშირის ლიდერები შეთანხმდნენ, რომ რუსეთის წინააღმდეგ სანქციები ორჯერ გაახანგრძლივონ

ბულგარეთის პრორუსულმა პრემიერ-მინისტრმა პირობა დადო, რომ ვეტოს დაადებს ევროკავშირის ახალ სანქციების პაკეტს რუსეთის წინააღმდეგ.