საქართველოს ეროვნული ნაკრები 2 ივნისს რუმინეთთან ამხანაგურ მატჩს გამართავს – შეხვედრა 21:00 საათზე დაიწყება, დღესვე მატჩის დროს ეროვნულ ნაკრებს დატოვებს კაპიტანი გურამ კაშია. 

გურამ კაშია არის ქართველი ფეხბურთელი, ცენტრალური მცველი, საქართველოს ეროვნული ნაკრების მოქმედი კაპიტანი და რეკორდსმენი ჩატარებული მატჩების რაოდენობით.

ეროვნულ ნაკრებში მისი დებიუტი შედგა  2009 წლის 1 აპრილს, მონტენეგროს წინააღმდეგ. ხოლო  ნაკრებს კაპიტნობს 2018 წლის ივნისიდან. 

უძღვა ნაკრებს ევრო 2024-ზე, სადაც გუნდმა მერვედფინალამდე მიაღწია, რისთვისაც სხვა წევრებთან ერთად ღირსების ორდენი გადაეცა.

კაშიამ ოფიციალურად გამოაცხადა სანაკრებო კარიერის დასრულების შესახებ; მისი ბოლო გამომშვიდობების მატჩი ნაკრებში 2026 წლის 2 ივნისს რუმინეთის წინააღმდეგაა ჩანიშნული, რის შემდეგაც კაპიტნის სამკლაურს ხვიჩა კვარაცხელია გადაიბარებს.

წლის საუკეთესო ფეხბურთელი: დასახელდა ორჯერ, 2012 და 2013 წლებში.

UEFA #EqualGame ჯილდო: 2018 წელს გახდა ამ ჯილდოს პირველი მფლობელი ლგბტქ+ თემის მხარდამჭერი სამკლაურით თამაშის გამო გამოჩენილი პრინციპულობისთვის. 

"ახლა უკვე შემიძლია ვთქვა, რომ განსაკუთრებულად ვემზადები ჩემი ბოლო სანაკრებო მატჩისთვის, რომელიც ივნისში მელოდება. მსურდა, ეს გადაწყვეტილება პირადად მეთქვა თქვენთვის - საქართველოს ნაკრების გულშემატკივრებისთვის, ჩემი ქომაგებისთვის და მთელი ქვეყნისთვის. 38 წლის ასაკში დადგა დრო, დიდი მადლობა გადაგიხადოთ და გაცნობოთ ჩემი 17-წლიანი სანაკრებო კარიერის დასრულების შესახებ. წესით, ეს ფრაზა პასუხობს ყველა კითხვას ჩემს გადაწყვეტილებასთან დაკავშირებით.

ნამდვილად ხანგრძლივი, საინტერესო და მოგონებებით სავსე იყო ეს საფეხბურთო თავგადასავალი. ბედნიერი ვარ, რომ წლების განმავლობაში ვემსახურები ჩემს ქვეყანას და წარმოვადგენ სპორტის იმ სახეობას, რომელიც მთელ მსოფლიოში უყვართ. მიხარია, რომ მქონდა შესაძლებლობა მეთამაშა სხვადასხვა თაობის გამორჩეულ ქართველ ფეხბურთელებთან ერთად. უდიდესი პატივია ვიყო ასეთი ნიჭიერი მოთამაშეებით დაკომპლექტებული და საამაყო გუნდის კაპიტანი. ჩვენ ერთად მივაღწიეთ არა მხოლოდ ჩვენს მიზნებს, არამედ თითოეული ქართველის დიდ ოცნებას - ვითამაშეთ ევროპის ჩემპიონატზე. ამ გზასთან დაკავშირებული თითოეული მომენტი ჩემთვის ისტორიაზე მეტია.

თითოეულ მწვრთნელთან და გუნდის წევრთან გატარებული ყოველი წუთი დაუვიწყარია - ამაზე უფრო ვრცლად აუცილებლად ვისაუბრებთ.გამორჩეულია ყველა ემოცია, რომელსაც გულშემატკივრებისგან, როგორც სტადიონზე, ისე მის გარეთ ვგრძნობ. სწორედ ისინი ამრავალფეროვნებენ ჩემს კარიერას. თითოეული სიტყვა და ფრაზა, რომელიც თქვენგან მომისმენია, ჩემთვის ძვირფასია.

მინდა განსაკუთრებული მადლობა ვუთხრა ფეხბურთის ფედერაციას. ყოველთვის ვგრძნობდი გვერდში დგომას. უახლოეს ორ შეხვედრას ახლა მეც უკვე, როგორც გულშემატკივარი, დაველოდები, ხოლო ივნისში, ამხანაგურ მატჩში რუმინეთთან, ჩემი საამაყო მაისურით საქართველოს ნაკრებში ბოლოჯერ ვითამაშებ. შევხვდებით - ჩემს 129-ე, ბოლო და ყველაზე დაუვიწყარ სანაკრებო მატჩზე", - განაცხადა კაშიამ 23 მარტს.

ავტორი: ექსპრესნიუსი,

სოციალური ქსელები

პოლონელების ხოცვა, უკრაინელების ეთნიკური წმენდა - რატომ დაუპირისპირდა ვარშავა და კიევი ერთმანეთს - ისტორიული ფაქტები

ევროპაში საბრძოლო ველზე სუპერტანკი წარადგინეს, რომელიც რობოტული კოშკურითა და დრონებითაა აღჭურვილი .

ვენსი შვეიცარიაში ირანთან მოლაპარაკებებისთვის ჩავიდა

მზია ამაღლობელი - ელენე ხოშტარიას მდგომარეობის დაიგნორება გაუჭირდებათ - მინდა მას ვუთხრა, რომ მარტო არ არის