თბილისის მერიის მხარდაჭერით, 19 ოქტომბრიდან 19 ნოემბრამდე, მიხეილ თუმანიშვილის სახელობის ხელოვნების საერთაშორისო ფესტივალი გაიმართება. ამასთან დაკავშირებით დღეს, სასტუმრო „მუზეუმში“ პრესკონფერენცია გაიმართა. 

ფესტივალის 2019 წლის პროგრამაზე და სიახლეებზე ფესტივალის სამხატვრო ხელმძღვანელმა ქეთი დოლიძემ და გენერალურმა მენეჯერმა სოფო თორთლაძემ ისაუბრეს. პრესკონფერენციას ესწრებოდენ ესპანეთის დიპლომატიური მისიის ხელმძღვანელი საქართველოში ხორხე ლუჩინი სერანო დე ჰარო, ფრანგული ინსტიტუტის დირექტორი პიერ კლუე და თბილისის მერიის კულტურის, განათლების, სპორტისა და ახალგაზრდულ საქმეთა საქალაქო სამსახურის უფროსი ირაკლი გვილავა.

„შემოდგომის დასასრულს თბილისს უდიდესი საჩუქარი ელის. ქართული და უცხოური სპექტაკლებით გაჯერებული, არაჩვეულებრივი პროგრამა მოგვიმზადეს ფესტივალის ორგანიზატორებმა, რაც თბილისის კულტურულ ცხოვრებას კიდევ უფრო ამდიდრებს და მრავალფეროვნებას სძენს. მრავალი წელია დედაქალაქის მერია ფესტივალის აქტიური მხარდამჭერია და ზუსტად ამგვარი პროექტების მეშვეობით თბილისი არის საფესტივალო ქალაქი და აუცილებლად გახდება კულტურის დედაქალაქი რეგიონში“, - განაცხადა ირაკლი გვილავამ.

ფესტივალს წელს გახსნის ფრანგული თანამედროვე ცეკვის მნიშვნელოვანი წარმომადგენელი მაგი მარენი, თავისი საკულტო დადგმით - May B. გარდა ამისა, თბილისს ესტუმრება ცეკვის ამერიკელი ლეგენდა კაროლინ კარლსონი და მისი დასი, წარმოდგენით „სინქრონულობის გზაჯვარედინზე“.

2019 წლის პროგრამის ერთ-ერთი მთავარი მოვლენაა „ესპანური კულტურის ფოკუსი“, რომელიც ესპანეთის კულტურის სამინისტროსა და ხელოვნების საბჭოსთან (Accion Cultiral Espanol- AC//E) თანამშრომლობით შედგა. ფოკუსი ოფიციალურად გაიხსნება 22 ოქტომბერს,   რუსთაველის თეატრის „სტუმრების ოთახში“ გამართულ კონფერენციაზე. 23 ოქტომბერს წარმოდგენილი იქნება სპექტაკლი „ეს არ არის ბერნარდა ალბას სახლი“; 7 ნოემბერს გრიბოედოვის თეატრში  გაიმართება როსიო მოლინას წარმოდგენა „დაცემული ანგელოზი“, რომელიც ლორენს ოლივიეს პრიზის ლაურეატია; 16 ნოემბერს ესპანურ ფოკუსს  დახურავს ესპანეთის ეროვნული თეატრების Teatro Español და Naves de Matadero სამხატვრო ხელმძღვანელის, ნატალია მენენდესის ლექცია „რა სარგებლობა მოაქვს თეატრს ქალაქისთვის“. ლექციაზე გაზიარებული იქნება ესპანური გამოცდილება თეატრის განვითარებისა და მიმდინარე პროცესების შესახებ. 

პრესკონფერენციაზე განსაკუთრებული ყურადღება დაეთმო ფესტივალის მიერ წარმოებულ პირველ კო-პროდუქციას. ფესტივალზე გაიმართება ცნობილი უკრაინელი რეჟისორის ანდრი ჟოლდაკის მსოფლიო პრემიერა - „მეფე ლირი. ანდრი ჟოლდაკის წამოსახვა“, უილიამ შექსპირის პიესის “მეფე ლირის” მიხედვით (გრიბოედოვის თეატრი; 20:00 საათი; 17,18,19 ნოემბერი). სპექტაკლი განხორციელდა კულტურის ინტერნაციონალიზაციის ხელშეწყობის პროგრამის „საქართველო ევროპაში“ და პროექტ “Check In Georgia”-ს ფარგლებში.

სრულ ინფორმაციას ფესტივალის შესახებ გაეცანით მითითებულ ბმულზე:  https://www.facebook.com/giftfestival

(NS)

ავტორი: ექსპრესნიუსი,

სოციალური ქსელები

ეჩმიაძინში სრულიად სომეხთა კათოლიკოს გარეგინ II-ის სასამართლო პროცესი მიმდინარეობს

ქუთაისში „ავტო გალერის“ ახალი მულტიბრენდული სივრცე გაიხსნა

თურქეთი, საუდის არაბეთი და პაკისტანი „აგრესორების“ წინააღმდეგ ერთად იბრძოლებენ: შეთანხმებას ხელი მოეწერა

აშშ-ის დაზვერვა ვარაუდობს, რომ პუტინს შეუძლია უკრაინაში ომის პარალელურად ნატოს წევრ ქვეყანაზე თავდასხმა