რუსეთის მიერ ე.წ. საზღვრის გადმოწევის საკითხზე გაფართოებული კომისიის სხდომაზე იმსჯელებენ

2015-07-13 16:05:27, 483 ნახვა

პოლიტიკა

დე-ფაქტო სამხრეთ ოსეთის ე.წ. საზღვრის აღმნიშვნელი ბანერების გადმოწევასთან დაკავშირებით გაფართოებულ კომისიის სხდომაზე იმსჯელებენ.

ამ ინიციატივით საპარლამენტო უმრავლესობის წევრი გია ვოლსკი ბიუროს დღევანდელ სხდომაზე გამოვიდა.
როგორც მან აღნიშნა, მას ამ საკითხთან დაკავშირებით კონსულტაციები შსს-სთან, პრემიერის წარმომადგენლებთან, შერიგებისა და სამოქალაქო თანასწორობის საკითხებში სახელმწიფო მინისტრთან და სხვა შესაბამის უწყებებთან ჰქონდა.
ვოლსკიმ რუსეთის ქმედებაც შეაფასა და აღნიშნა, რომ ის ენერგო დერეფნის კონტროლისკენ მიისწრაფვის.
„სამხედრო ბაზებით რუსეთი არღვევს ყველა ხელშეკრულებას და უკვე აშკარად გამოხატავს თავის მისწრაფებას იმ სტრატეგიული გეგმის განსახორციელებლად, რაც შეეხება ენერგო დერეფნების კონტროლს. ეს ყველაფერი ჩამოწერილი ჰქონდა 2006 წელს, ეროვნული უსაფრთხოების სტრატეგიაში, რომელიც 2020 წლამდეა დამტკიცებული. ასე, რომ ჩვენ სწორედ ამ კუთხით უნდა ვიფიქროთ და საერთაშორისო თანამეგობრობაც უნდა დადგეს იმ პოზიციაზე, როცა რუსეთი ამ თავისი ოკუპაციით უპირისპირდება არა მარტო ქართულ, არამედ საერთაშორისო ინტერესებს“, - აღნიშნა ვოლსკიმ.
ვოლსკის ინიციატივა იყო, რომ გაფართოებული კომისიის სხდომა 20 ივლისს გამართულიყო. თუმცა, დეპუტატმა ზვიად კვაჭანტირაძემ განაცხადა, რომ ეს შეხვედრა რუსეთთან ურთიერთობის საკითხებში პრემიერის სპეციალური წარმომადგენლის ზურაბ ჯაფარიძის საქართველოში ჩამოსვლის შემდეგ გაიმართოს.