ანექსირებული ყირიმის ე.წ სასაზღვრო სამსახურმა საქართველოს მოქალაქე დააკავა

2017-02-20 19:12:03, 2661 ნახვა

მსოფლიო

ანექსირებული ყირიმის ე.წ სასაზღვრო სამსახურმა საქართველოს მოქალაქე დააკავა, რომელიც უკრაინაში გამგზავრებას ყალბი საბუთით ცდილობდა, - ამის შესახებ Tass-ი სასაზღვრო სამსახურის წარმომადგენელზე დაყრდნობით იუწყება.

მედია საშუალების ინფორმაციით, მოქალაქემ ცხინვალის დე ფაქტო ხელისუფლების მიერ გაცემული პასპორტი წარადგინა.

"შემოწმებისას დადგინდა, რომ დოკუმენტი არსებულ ნორმებს არ აკმაყოფილებდა, შეიცავდა ორთოგრაფიულ შეცდომებს და ჩვეულებრივი პრინტერით იყო დაბეჭდილი. ამასთან, საბუთს ეტყობოდა, რომ სპეცშეკვეთით იყო დამზადებული", - ნათქვამია ე.წ სამსახურის განცხადებაში.

მედიის ცნობით, 55 წლის კაცმა განმარტა, რომ ის საქართველოს მოქალაქეა და ძალოვნებს აღიარებითი ჩვენება მისცა. აღნიშნულთან დაკავშირებით აღძრულია სისხლის სამართლის საქმე „რუსეთის საზღვრის უკანონო გადაკვეთის“, "თავდაცვის მომზადებისა და მცდელობის" საქმეზე.

საქართველოს მოქალაქეს 200 ათასი რუბლის ოდენობის ჯარიმა ან ორ წლამდე თავისუფლების აღკვეთა ემუქრება.

ინფორმაციის გადასამოწმებლად "ექსპრენიუსი" საქართველოს საგარეო საქმეთა სამინისტროს დაუკავშირდა. როგორც უწყებაში განაცხადეს, ამ ეტაპზე მსგავსი ინფორმაცია რუსული მხარის მიერ შვეიცარიელების გავლით, მათთან არ არის შემოსული.

"ვესაუბრეთ მოსკოვის კონსულს და მსგასი ფაქტის შესახებ არანაირი ინფორმაცია არ აქვთ მიღებული. ამ ეტაპზე, ვერც ვადასტურებთ და ვერც უარვყოფთ. ზოგადად, შეიძლება დღევანდელი ფაქტია და ელემენტარულად ბიუროკრატიაა, რომ არ არის მისული ეს ინფორმაცია ჩვენამდე, არის ასევე ის მომენტი, რომ მოქალაქეს შეუძლია მოითხოვოს მისი ვინაობის არგამხელა მისივე ქვეყნის საკონსულო სამსახურთან და ასეთ შემთხვევაში ვალდებულია ყველა ქვეყანა, რომ დაიცვას კონფიდენციალურობა. ამ ეტაპზე მსგავსი ინფორმაცია რუსული მხარის მიერ შვეიცარიელების გავლით, ჩვენთან არ არის შემოსული", - განუცხადეს "ექსპრესნიუსს" საგარეო უწყებაში.