სესიაშვილი თავდაცვის სამინისტროდან თანამშრომლების გათავისუფლებაზე: ვწუხვარ, მაგრამ ეს საქმე გასაკეთებელია

2016-12-21 22:11:59, 1072 ნახვა

სამხედრო

სამწუხაროდ, თავდაცვის სამინისტრო საჭიროებდა და დღესაც საჭიროებს სერიოზულ ოპტიმიზაციას, - ასე ეხმაურება პარლამენტის თავდაცვისა და უშიშროების კომიტეტის ხელმძღვანელი ირაკლი სესიაშვილი თავდაცვის სამინისტროში მიმდინარე რეფორმას და რეორგანიზაციის პროცესს.

როგორც ტელეკომპანია "იმედის" ეთერში სესიაშვილმა განაცხადა, ეს ის მტკივნეული ნაბიჯებია, რომელიც სჭირდება თითოეულ ჯარისკაცს, თითოეულ ოფიცერს, ეროვნული თავდაცვის ინტერესებს. ამიტომ, ის წუხილს გამოთქვამს, მაგრამ ეს საქმე გასაკეთებელია.

„მესმის ნებისმიერი ადამიანის, სამსახურიდან გათავისუფლება, სამსახურის დაკარგვა ძალიან რთულია, მაგრამ მინდა პირდაპირ ვთქვა, სამწუხაროდ, თავდაცვის სამინისტრო საჭიროებდა და დღესაც საჭიროებს სერიოზულ ოპტიმიზაციას. მე არ ვამბობ ამას დღევანდელი გადმოსახედიდან. მინდა გითხრათ, რომ ყველა მინისტრისთვის, რომელიც თავდაცვას ხელმძღვანელობდა, ეს პრობლემა ნათელი იყო და სერიოზული სიმწვავით იდგა. ეს ამოტრიალებული პირამიდა უნდა გამოვასწოროთ, რეალურად უნდა ჩავჯდეთ იმ სტანდარტებში, რასაც ნატოს სტანდარტი ჰქვია. თავად სამხედროებმა ძალიან კარგად იციან, რომ ხშირ შემთხვევაში უფროსი ოფიცრები უფრო მეტნი არიან, ვიდრე უმცროსი ოფიცრები, რომელთა საჭიროება დღეს გაცილებით მეტია, ვიდრე პირიქით. ასევე, შეიძლება სამხედრო პოლიციის რიცხოვნობა გადამეტებული იყოს, აჭარბებდეს პროპორციულად საერთო შეიარაღებული ძალების რიცხოვნობას და თანაფარდობა იყოს არასწორი. ადამიანურად, ჩემი პოზიციიდან გამომდინარეც, მე თანავუგრძნობ ამ ადამიანებს, მაგრამ ეს ის მტკივნეული ნაბიჯებია, რომელიც სჭირდება თითოეულ ჯარისკაცს, თითოეულ ოფიცერს, ეროვნული თავდაცვის ინტერესებს. ამიტომ, ვწუხვარ, მაგრამ ეს საქმე გასაკეთებელია“, - განაცხადა ირაკლი სესიაშვილმა.

შეგახსენებთ, სამხედრო პოლიციიდან დღეს 100-მდე თანამშრომელი დაითხოვეს.