ტრანსგენდერი ქალი, რომელიც მძიმედ დაჭრეს, გარდაიცვალა

2016-11-23 00:30:42, 1158 ნახვა

საზოგადოება

15 ოქტომბერს ორთაჭალაში ტრანსგენდერი ქალი ზიზი რომელიც სცემეს და მძიმედ დაჭრეს, დღეს ღამით გარდაიცვალა.

როგორც "ექსპრესნიუსს" "ნიუ ჰოსპიტალში" უთხრეს, გარდაცვალების მიზეზი სიცოცხლესთან შეუთავსებელი ტრამვები იყო, თუმცა დეტალური დასკვნა მოგვიანებით გახდება ცნობილი. დაზარალებული, ამ დრომდე მართვით სუნთქვაზე იმყოფებოდა.

ორთაჭალაში ტრანსგენდერს ორმა პირმა მრავლობითი ჭრილობები მიაყენა და ფიზიკურად გაუსწორდა. მსხვერპლს ჭრილობები კისრის არეში ჰქონდა მიყენებული და მძიმე მდგომარეობაში იმყოფებოდა. იმავე დღეს შინაგან საქმეთა სამინისტრომ ფაქტზე გამოძიება 19-108 მუხლით დაიწყო, რაც განზრახ მკვლელობას გულისხმობს.

19 ოქტომბერს თბილისის საქალაქო სასამართლომ ტრანსგენდერი ქალის მკვლელობის მცდელობაში ბრალდებულს წინასწარი პატიმრობა შეუფარდა.

Patreon P მხარი დაუჭირე "ექსპრესნიუსს" →

ავტორი: ირაკლი მანაგაძე , ექსპრესნიუსის რეპორტიორი 2009 წლიდან