შინაგან საქმეთა სამინისტროში კიბერდანაშაულთან ბრძოლის საკითხზე საინფორმაციო შეხვედრა გაიმართა. შეხვედრა მიზნად ისახავდა, კიბერდანაშაულის პრევენციის მიზნით, ფართომასშტაბიანი საინფორმაციო კამპანიის დაწყებას.

ღონისძიება შს მინისტრმა გიორგი მღებრიშვილმა გახსნა. როგორც მან აღნიშნა, კიბერდანაშაული გლობალური გამოწვევაა, რომელიც განვითარებული ქვეყნების დღის წესრიგში სულ უფრო აქტიურად განიხილება. შესაბამისად, შს სამინისტროს ერთ-ერთი პრიორიტეტული მიმართულება კიბერდანაშაულის პრევენცია და მასთან ბრძოლაა.

„კიბერდანაშაულს არ აქვს საზღვრები და რაიმე ეროვნული ნიშანი. საქართველოც ეკონომიკური განვითარების, ტექნოლოგიური განახლების, ევროატლანტიკურ სივრცეში უფრო მეტად ინტეგრაციის, ინსტიტუტების მოდერნიზაციის პროცესში უფრო და უფრო მეტი სიცხადით დგება ამ გამოწვევის წინაშე. ინტერნეტტექნოლოგიებსა და ელექტრონულ სერვისებს ჩვენი თანამოქალაქეები ყოველდღიურად იყენებენ პირადი კომუნიკაციის, ბიზნესის კეთების, გადასახადების გადახდისა თუ განათლების მიღების მიზნით. ამიტომ, მათი უსაფრთხოება ჩვენთვის ძალიან მნიშვნელოვანია“, - განაცხადა გიორგი მღებრიშვილმა.

შს მინისტრმა განსაკუთრებული ყურადღება გაამახვილა პრევენციაზე, რომელსაც ასეთი სახის დანაშაულის წინააღმდეგ გადამწყვეტი მნიშვნელობა აქვს და, შესაბამისად, მოსახლეობის ინფორმირებაზე, რაც კიბერდანაშაულით დაზარალებული ადამიანების რაოდენობას შეამცირებს.

ღონისძიებაზე შს მინისტრის მოადგილე არჩილ თალაკვაძემ პრეზენტაცია წარმოადგინა, სადაც კიბერდანაშაულის გავრცელებულ კატეგორიებზე, მომხმარებელთა დაცვის პრინციპებზე, სახელმწიფო უწყებებთან და კერძო კომპანიებთან თანამშრომლობაზე, ასევე, ამ მიმართულებით, შსს-ს სამომავლო გეგმებზე ისაუბრა.

შს სამინისტროს ცენტრალური კრიმინალური პოლიციის კიბერდანაშაულის წინააღმდეგ ბრძოლის სამმართველოს თანამშრომლებმა, პრევენციის მიზნით მოსახლეობის ინფორმირებისთვის, რჩევები და რეკომენდაციები მოამზადეს. გაიმართა კიბერდანაშაულის პრევენციის თემაზე კლიპის პრეზენტაციაც.

შეხვედრას პერსონალურ მონაცემთა დაცვის ინსპექტორი, სახელმწიფო უსაფრთხოების სამსახურის, იუსტიციის სამინისტროს, მონაცემთა გაცვლის სააგენტოს, პროკურატურის, თავდაცვის სამინისტროს, კრიზისების მართვის საბჭოს წარმომადგენლები და ჟურნალისტები ესწრებოდნენ.

დღესვე, შს მინისტრი გამოვიდა ინიციატივით, დაწესდეს კიბერუსაფრთხოების შესახებ ეროვნული საინფორმაციო კვირეული, რომლის ფარგლებშიც, ყოველწლიურად, შესაბამისი უწყებები ერთობლივ საინფორმაციო კამპანიას ჩაატარებენ.

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

სოციალური ქსელები

რიკოთზე ავარიას 2 ადამიანი ემსხვერპლა, დაშავდა ბავშვი

ზურაბ ჯაფარიძე: ერთადერთი, რაც თვითმხილველებს „ახსოვთ“, არის ის, რომ ჩვენ „ზეწოლისკენ“ მოვუწოდეთ

კონგრესმენმა უილსონმა ეუთოს საპარლამენტო ასამბლეის სხდომიდან ქართული დელეგაციის წასვლა სამარცხვინო უწოდა

უტა ბერიას ფილმის ,,ცრემლსადენი გაზი" მსოფლიო პრემიერა ლოკარნოს კინოფესტივალის სექციაში შედგება