საქართველოს პრეზიდენტი და პირველი ლედი ბრიუსელში ვიზიტის ფარგლებში, საქართველოს დამოუკიდებლობის აღდგენის 25 წლისთავთან დაკავშირებით გამართულ საზეიმო ღონისძიებას დაესწრნენ. 

ქვეყნის პირველმა პირმა მიწვეულ სტუმრებს სიტყვით მიმართა და მადლობა გადაუხადა ჩვენი ქვეყნის ეროვნული დღესასწაულის გაზიარებისათვის.

„მსურს თითოეულ აქ დამსწრე სტუმარს მადლობა გადავუხადო ამ მნიშვნელოვანი დღის ჩვენთან ერთად აღნიშვნისათვის, მათ ვინც ეს დღე 26 მაისს ჩვენთან ერთად აღნიშნა. ეს დღე ევროპის ბევრ დედაქალაქსა და მსოფლიოს ბევრ ქვეყანაში საქართველოს დროშის ფერებით აღინიშნა.  ჩემთვის პატივია დღეს თქვენთან ერთად ვიმყოფებოდე აქ,  ევროკავშირისა და ნატო-ს დედაქალაქში და ჩემი ქვეყნისთვის მნიშვნელოვან თარიღს თქვენთან ერთად ვზეიმობდე.

25 წლის წინ ჩვენ გავხდით დამოუკიდებლები, ჩვენ აღვადგინეთ დამოუკიდებლობა, რაც ნიშნავდა დამოუკიდებლობას საბჭოთა კავშირისაგან. ამ თარიღიდან მოყოლებული ჩვენ დავიწყეთ ბრძოლა თავისუფლებისათვის და ეს ნიშნავს ემსახურო იმ მიზნებსა და ღირებულებებს, რომლებისაც გჯერა.

საქართველოს დამოუკიდებლობის 25 წლისთავთან დაკავშირებით, მე ეს წელი ევროპული სახელმწიფოს წლად გამოვაცხადე, რადგან ღრმად მწამს, რომ ევროპული სახელმწიფოებრიობა არის ის, რასაც საქართველო მიეკუთვნება და ეს არის ის ფორმა, რომელშიც საქართველო იქნება თავისუფალი.

მე ვეკუთვნი იმ კულტურას და ხალხს, რომელიც აფასებს  თავისუფლებას, ინდივიდუალურ არჩევანს და პატივს სცემს სხვა ხალხების ინდივიდუალურ არჩევანსაც.

მჯერა, რომ ევროპული სახელმწიფოს შენება არის  ჩემი ხალხის ის მიზანი, რომელიც სამი ათას წელს ითვლის და შესანიშნავად შეეფერება მათ არჩევანს. 

ჩვენ ვიკისრეთ ვალდებულება ევროპული ოჯახის მიმართ და არაერთგზის ვახორციელებთ ამ ვალდებულებას, იქნება ეს პოლიტიკური, საომარი მოქმედებების, ქართველების სამხედრო  მსახურებითა თუ საქართველოს შიგნით იმ ღირებულებების გაზიარებით, რომლებიც ჩვენ ყველას გაგვაჩნია.

ჩემი ვიზიტი სტრასბურგსა და ბრიუსელში ემსახურება ზუსტად ამ ვალდებულებებისა და ჩვენი სტრატეგიული გზის კვლავ დადასტურებას, ასევე ახალი პარტნიორებისა და მეგობრების შეძენას.  დღეს ჩვენ გვაქვს დღესასწაული, რომელსაც ვიზიარებთ საერთო ღირებულების მქონე ჩვენს მეგობრებთან.  ნება მიბოძეთ მტკიცედ განვაცხადო, რომ რაც არ უნდა რთული იყოს ეს გზა საქართველოსთვის, ჩვენ ძალიან ძლიერები ვიქნებით ამ გზაზე და ჩვენ ამას დავამტკიცებთ. კიდევ ერთხელ, მოხარული ვარ, რომ თქვენთან ერთად აღვნიშნავ ამ თარიღს. ღმერთმა დალოცოს საქართველო",-  განაცხადა საქართველოს პრეზიდენტმა.

ღონისძიებას, რომელიც საქართველოს საელჩოს ორგანიზებით გაიმართა სპეციალურად  მოწვეული კვარტეტი აფორმებდა. 

მოწვეულ სტუმრებს შორის იყვნენ ევროკავშირის სხვადასხვა ინსტიტუტებისა და დიპლომატიური კორპუსის წარმომადგენლები, ასევე ბელგიის სამეფოსა და ევროპის სხვადსხვა ქვეყნებში მცხოვრები თუ მოღვაწე ქართველები.

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

სოციალური ქსელები

ირანი აცხადებს, რომ აშშ-ის საჰაერო თავდასხმების შედეგად 14 ადამიანი დაიღუპა

აი ჯი დეველოფმენტ ჯორჯიამ, გალტ & თაგარტის ექსკლუზიური მხარდაჭერით, 39.5 მილიონი აშშ დოლარის მწვანე ობლიგაციები განათავსა

კორეული პრემიუმ ბრენდი Manyo უკვე PSP-შია

სახელმწიფოს ლამარიას მონასტრის ტერიტორიაზე კელიების სამშენებლო სამუშაოებზე სააგენტოს ნებართვა არ გაუცია, ეპარქია თავს იმართლებს