2024-12-06 10:48:19, 5366 ნახვა

---

ლიეტუვის სეიმმა მიიღო რეზოლუცია, რომლითაც მოუწოდებს EU-ს, საქართველოს ოფიციალურ პირებს პერსონალური სანქციები დაუწესოს

ლიეტუვის სეიმმა მიიღო რეზოლუცია, რომლითაც მოუწოდებს ევროკავშირს, საქართველოს ოფიციალურ პირებსა და პოლიტიკურ ლიდერებს პერსონალური სანქციები დაუწესოს.

რეზოლუცია, (პროექტი No XVP-47), რომელიც სეიმმა 109 ხმით ერთის წინააღმდეგ მიიღო, საქართველოში ახალი საპარლამენტო არჩევნების ჩატარების შესახებ ევროპარლამენტის მოწოდებასაც მხარს უჭერს.

„სეიმი მოუწოდებს ევროკავშირს და მის წევრ ქვეყნებს, დაუწესონ პერსონალური სანქციები საქართველოს ოფიციალურ პირებსა და პოლიტიკურ ლიდერებს, რომლებიც პირდაპირ ან ირიბად არიან პასუხისმგებელი ქვეყნის მშვიდობიანი მოსახლეობის წინააღმდეგ განხორციელებულ ძალადობრივ რეპრესიებზე; 

სეიმი ასევე მოუწოდებს EU-ს, შეზღუდონ ოფიციალური კონტაქტები ევროკავშირის დონეზე საქართველოს მთავრობასთან და პარლამენტთან, შეაჩერონ საქართველოს მთავრობისა და ხელისუფლების ფინანსური მხარდაჭერა და შესაბამისად, გაზარდონ მხარდაჭერა საქართველოს სამოქალაქო საზოგადოებისა და თავისუფალი მედიისთვის“,- აღნიშნულია რეზოლუციაში.

რეზოლუციაში ასევე ნათქვამია, რომ სეიმი მტკიცედ უჭერს მხარს ქართველი ხალხის ლეგიტიმურ ევროპულ მისწრაფებებს და მათ სურვილს, აყვავებულ დემოკრატიულ ქვეყანაში იცხოვრონ.

„ლიეტუვის პარლამენტი კატეგორიულად გმობს საქართველოს მთავრობის მხრიდან ძალადობას მშვიდობიანი მომიტინგეების მიმართ თბილისსა და ქვეყნის სხვა ქალაქებში, ასევე სამოქალაქო საზოგადოებისა და მედიის წარმომადგენლების დაშინებას, უკანონო დაკავებასა და რუსული პროპაგანდის, დეზინფორმაციის სისტემატურ გავრცელებას მმართველი ხელისუფლების წარმომადგენლების მიერ...

არჩევნების დარღვევების მასშტაბის გათვალისწინებით, როგორიცაა ბიულეტენების გაყალბება, ამომრჩეველთა თავისუფალი ნების შეზღუდვა, დამკვირვებლებისა და მედიის საქმიანობაში ჩარევა და დამოუკიდებლობის შელახვა, სეიმმა დაასკვნა, რომ საქართველოს პარლამენტის 2024 წლის 26 ოქტომბრის არჩევნები ვერ აკმაყოფილებს დემოკრატიული არჩევნების საერთაშორისო სტანდარტებს და ამიტომ არ უნდა ჩაითვალოს არც თავისუფლად და არც სამართლიანად. სეიმის რეზოლუცია მხარს უჭერს ევროპარლამენტის მოწოდებას, საქართველოში ახალი საპარლამენტო არჩევნების ჩატარების შესახებ“,- აღნიშნულია დოკუმენტში.

სეიმი რეზოლუციაში ასევე აღნიშნავს, გააგრძელებს ქართველი ხალხის ევროკავშირში ინტეგრაციის მისწრაფებების მხარდაჭერას, თუმცა ამ გზაზე პროგრესი შეჩერებულია მანამ, სანამ არ გადაწყდება ძირითადი პრობლემები, რომლებიც დაკავშირებულია ევროკავშირის გაფართოების ფუნდამენტურ კრიტერიუმებთან.

---

ავტორი: ექსპრესნიუსი,

---

დღის თემა

მთავარი თემა

ინტერვიუ - ექსკლუზივი