2024-10-15 11:56:17, 386 ნახვა

---

წითლიძე - მოქმედებს ე.წ. ძალოვანთა შტაბი, რომელსაც სამხარეო პოლიციის უფროსი ხელმძღვანელობს და რომელიც მოქალაქეებს პირადობებს ართმევს

პარლამენტის წევრი, კოალიცია "ერთიანობა - ნაციონალური მოძრაობის" ზუგდიდის ორგანიზაციის თავმჯდომარე ანა წითლიძე აცხადებს, რომ ზუგდიდსა და სენაკში მოქმედებს ე.წ. ძალოვანთა შტაბი, რომელიც მისი თქმით, მოქალაქეებს პირადობის მოწმობებს ართმევს.

წითლიძემ ცოტა ხნის წინ ზუგდიდში გამართულ ბრიფინგზე დაასახელა პიროვნებები, რომელთა შორისაც პოლიციის მაღალჩინოსნები, მერიისა და აიიპ-ების თანამშრომლებიც არიან. 

"დღეს მე დავასახელებ ადამიანებს, რომლებიც სენაკსა და ზუგდიდში ასრულებენ უკანონო დავალებას და პირადობის მოწმობებს ართმევენ იმ მოქალაქეებს, რომლებიც ოპოზიციურად არიან განწყობილი, რათა ისინი არ მივიდნენ არჩევნებზე. ჩემს მიერ დასახელებული პირები იმის ნათელი მაგალითია, თუ როგორ თანამშრომლობს კრიმინალი და სახელმწიფო ერთმანეთთან, "ქართული ოცნების" სასარგებლოდ. 

სენაკში მოქმედებს პირადობის მოწმობების ჩამორთმევით დაკავებული ე.წ. ძალოვანთა შტაბი რომელსაც ხელმძღვანელობს სამეგრელოს სამხარეო პოლიციის უფროსი გიგა ზესაშვილი. ასევე სენაკში, პირადობის მოწმობების ჩამორთმევაში არიან მხილებული პოლიციის თანამშრომლები:
ბადრი გოგინავა - სამხარეო პოლიციის თანამშრომელი, ბუთხუზი სირია - ნოსირის პოლიციის განყოფილების უფროსი, კახა ჭაავა - ზანის განყოფილების უფროსი, ასევე, მერიისა და აიიპ-ის თანამშრომლები: ბეჟან გუნია, მონიკა ვასილევა, სოსო მატახერია, დათო საჯაია, თორნიკე ჯიჯეიშვილი. 

ზუგდიდში პირადობის მწმობების ჩამორთმევებს ორგანიზებას უწევს დათო შენგელია - ე.წ. ტყის ძმების მეთაური, გია ყალიჩავა - პოლიციის თანამშრომელი, გიზო ვეკუა - "ოცნების" აქტივისტი, ირაკლი ჯიქია - შსს-ს თანამშრომელი და ლაშა ვეკუა - საპატრულო პოლიციის თანამშრომელი. 

მივმართავ თითოეულ ამ ადამიანს:

ჩვენ გვაქვს მტკიცებულებები, როგორ აშინებთ მოსახლეობას და მათ გადავცემთ ყველა საერთაშორისო ორგანიზაციას. თქვენი მცდელობების მიუხედავად, "ერთიანობა - ნაციონალური მოძრაობა" 26 ოქტომბერს სამეგრელოსა და მთელ საქართველოში იქნება გამარჯვებული პარტია და თქვენ მოგიწევთ, პასუხი აგოთ თქვენს უკანონო ქმედებებზე. 

მოვუწოდებ შსს-ს, მოახდინოს დაუყოვნებელი რეაგირება ზემოაღნიშნული პირების უკანონო ქმედებებზე",- განაცხადა ანა წითლიძემ.

---

ავტორი: ექსპრესნიუსი,

---

დღის თემა

მთავარი თემა

ინტერვიუ - ექსკლუზივი