ვებგვერდ "ვიკილიქსის" დამფუძნებელმა, ჯულიან ასანჟმა დიდი ბრიტანეთის ციხე დატოვა. ამის შესახებ ინფორმაციას BBC ავრცელებს.

BBC-ის ცნობით, ასანჟი პატიმრობიდან გათავისუფლდა ამერიკის შეერთებული შტატების ხელისუფლებასთან შეთანხმების საფუძველზე მას შემდეგ, რაც წაყენებული ბრალი აღიარა. ბრალის აღიარების სანაცვლოდ, მას შეერთებული შტატების ციხეში სასჯელის მოხდა აღარ მოუწევს.

ასანჟი, მას შემდეგ, რაც ბელმარშის ციხის საკანი დატოვა, მშობლიურ ავსტრალიაში გაემგზავრა.

შეგახსენებთ, ჯულიან ასანჟმა "ვიკილიქსი" 2006 წელს დააარსა. 2010 წელს, ვებგვერდმა დიდი რაოდენობით კონფიდენციალური სამხედრო დოკუმენტები გამოაქვეყნა, რომლებიც ავღანეთისა და ერაყის ომებს ეხებოდა. გამოქვენებულ მასალებს შორის იყო ვიდეო, სადაც ნაჩვენებია, რომ ამერიკული ვერტმფრენიდან ბაღდადში სამოქალაქო პირებს ესვრიან.

"ვიკილიქსის" დამფუძნებელს ბრალად ედებოდა ეროვნული თავდაცვის ინფორმაციის მოპოვებისა და გამჟღავნების მიზნით შეთქმულებაში მონაწილეობა. წლების განმავლობაში, ამერიკის შეერთებული შტატები ამტკიცებდა, რომ ვებგვერდი, რომელიც ავრცელებდა ინფორმაციას ერაყისა და ავღანეთის ომების შესახებ, საფრთხეს უქმნიდა ადამიანების სიცოცხლეს, თავად ასანჟი მის წინააღმდეგ წარმოებულ საქმეს პოლიტიკურს უწოდებდა. ის 7 წლის განმავლობაში ლონდონში, ეკვადორის საელჩოს აფარებდა თავს. "ვიკილიქსის" დამფუძნებელი 2019 წელს დააკავეს. მან ბოლო 5 წელი ბრიტანეთის ციხეში გაატარა. დაკავების შემდეგ შეერთებული შტატები მის ექსტრადირებას ითხოვდა.

ასანჟს ასევე წაუყენეს შვედეთში გაუპატიურებისა და სექსუალური ძალადობის ცალკეული ბრალდებები, რაც მან უარყო.

ავტორი: ექსპრესნიუსი,

სოციალური ქსელები

ნატოს სამიტზე სტარმერმა ევროპას შორი მოქმედების იარაღისთვის 50 მლრდ-იანი გეგმა წარუდგინა

Reuters: ტრამპმა ნატოს ლიდერებს განუცხადა, რომ აშშ ალიანსში დარჩენას აპირებს

თიბისი კაპიტალმა მაკროეკონომიკური განახლება გამოაქვეყნა

თიბისის მხარდაჭერით, ლაგოდეხი ბლუზის მე-10 საერთაშორისო ფესტივალს უმასპინძლებს