გარემოს დაცვისა და სოფლის მეურნეობის მინისტრის მოადგილე ნინო თანდილაშვილი სამინისტროს მიერ ინიცირებული პროექტის „ქუთაისის დაბალემისიიანი განვითარება ურბანული დაგეგმარების გზით“ მიზნების, აქტივობებისა და სამუშაო გეგმის პრეზენტაციას დაესწრო. ამის შესახებ ინფორმაციას გარემოს დაცვისა და სოფლის მეურნეობის სამინისტრო ავრცელებს.

 უწყების ცნობით, შეხვედრის მონაწილეებმა პროექტის მოსალოდნელ შედეგებსა და თანამშრომლობის გზებზე იმსჯელეს. პროექტის  „ქუთაისის დაბალემისიიანი განვითარება ურბანული დაგეგმარების გზით“  მიზანია ქალაქ ქუთაისის ურბანული განვითარებისთვის ინსტიტუციური ჩარჩოს შექმნა, ინვესტიციების მოზიდვა დაბალემისიიანი ტრანსპორტისა და მიწის მდგრადი მართვის საუკეთესო პრაქტიკის სადემონსტრაციოდ.

„პროექტის ფარგლებში, საკმაოდ საინტერესო აქტივობები განხორციელდება. ქუთაისისთვის მწვანე ქალაქის განვითარების გეგმა და სტრატეგია შეიქმნება, მოეწყობა ველობილიკები. იგეგმება თანამედროვე ავტობუსების შეძენა, რაც შიდა სატრანსპორტო ქსელის განვითარებას შეუწყობს ხელს. ასევე, ქუთაისის მიმდებარედ, 700 ჰა ფართობის ტყის აღდგენა განხორციელდება, რაც ეკოსისტემების შენარჩუნებისთვის მნიშვნელოვანია. მუნიციპალურ დონეზე ცენტრალური ხელისუფლების ჩართულობით მსგავსი ტიპის პროექტების ინიცირება სამომავლოდაც გაგრძელდება, რაც მწვანე ინიციატივების განხორციელებას და წახალისებას შეუწყობს ხელს“, - განაცხადა ნინო თანდილაშვილმა.

 „ქუთაისის დაბალემისიიანი განვითარება ურბანული დაგეგმარების გზით“ სამწლიანი პროექტია (2022-2025), რომელსაც გლობალური გარემოსდაცვითი ფონდი (UNDP) აფინანსებს და გაეროს გარემოსდაცვითი პროგრამის მიერ კავკასიის გარემოსდაცვითი რეგიონული ცენტრის (REC- Caucasus) მეშვეობით ხორციელდება. პროექტის უშუალო ბენეფიციარია ქ. ქუთაისის მერია. პრეზენტაციას ქალაქ ქუთაისის მუნიციპალიტეტის მერი იოსებ ხახალეიშვილი, სამინისტროს სისტემაში შემავალი შესაბამისი უწყებების და კერძო სექტორის წარმომადგენლები ესწრებოდნენ.

ავტორი: NS (სტატია დაფინანსებულია),

სოციალური ქსელები

წილოსანი ტიტუშკების დაორგანიზებაზე - მოძრაობას საჯაროდ აქვს დაანონსებული, რომ მყისიერი რეაგირება ექნებათ, ამიტომ ყველამ გააკონტროლოს თავი

იურისტი - იდეოლოგიური ნიშნით ადამიანების დევნის მიზნის მქონე ორგანიზაციის შექმნა ხელისუფლებასთან დაახლოებული პირთა ჯგუფის მიერ არის არამხოლოდ მძიმე სამართლებრივი, არამედ, პოლიტიკური განაცხადიც

ევროკავშირმა შესაძლოა რუსეთის წინააღმდეგ მასშტაბური სანქციების დაწესებაზე უარი თქვას

სოფელ პერევის მიმდებარედ რუსი ოკუპანტების მიერ გატაცებული მოქალაქე თავისუფალია – სუს