2021-10-26 18:47:10, 861 ნახვა

---

გურამ გურამიშვილი - ევროკავშირის დაფინანსებით მიმდინარე პროექტი საქართველოს სარკინიგზო სატრანსპორტო დარგის განვითარებაში დაეხმარება

„საქართველო სარკინიგზო ტრანსპორტის დარგის განვითარების მნიშვნელოვან ეტაპზე იმყოფება. საქართველოს აქვს მზაობა და მისწრაფება, განახორციელოს რკინიგზის დარგის რეფორმირება ევროკავშირის საუკეთესო პრაქტიკის გათვალისწინებით და მის კანონმდებლობასთან დაახლოებით. იმედი გვაქვს, რომ ევროკავშირის დაფინანსებით მიმდინარე დაძმობილების პროექტი მნიშვნელოვნად დაეხმარება საქართველოს ასოცირების შესახებ შეთანხმებით ნაკისრი ვალდებულებების შემდგომ შესრულებაში, მათ შორის, სარკინიგზო სატრანსპორტო დარგის განვითარებაში," - განაცხადა საქართველოს ეკონომიკისა და მდგრადი განვითარების მინისტრის მოადგილე გურამ გურამიშვილმა პროექტის „საქართველოს სამართლებრივი  და ინსტიტუციური ჩარჩოს დაახლოების მხარდაჭერა ევროკავშირის კანონმდებლობასთან სარკინიგზო ტრანსპორტის დარგში" გახსნის ცერემონიაზე სიტყვით გამოსვლისას. 

გურამ გურამიშვილმა, საქართველოს ეკონომიკისა და მდგრადი განვითარების სამინისტროს სახელით, მადლობა გადაუხადა საქართველოში ევროკავშირის დელეგაციას, პოლონეთის ინფრასტრუქტურის სამინისტროს და პოლონეთის სხვა ინსტიტუციებს, რომლებიც ჩართულნი არიან პროექტში, აგრეთვე საქართველოს საგარეო საქმეთა სამინისტროს,  საქართველოს რკინიგზას აქტიური თანამშრომლობისთვის. 

მინისტრის მოადგილის განცხადებით, საქართველოს მთავრობისთვის სარკინიგზო ტრანსპორტის სექტორი ერთ-ერთ ძირითად პრიორიტეტს წარმოადგენს. მისი თქმით, ხაზგასასმელია სარკინიგზო ტრანსპორტის სფეროში მიმდინარე ინფრასტრუქტურული პროექტები. კერძოდ, აღსანიშნავია ბაქო-თბილისი-ყარსის სარკინიგზო ხაზის მშენებლობა, რომელიც ამჟამად სატესტო რეჟიმში ფუნქციონირებს. ამასთან აღსანიშნავია, რკინიგზის მოდერნიზაციის პროექტი, რომელიც ხორციელდება სს „საქართველოს რკინიგზის" მიერ  და რომლის მთავარი მიზანია უსაფრთხოების გაზრდა, გადაზიდვის დროისა და ინფრასტრუქტურული ხარჯების შემცირება.

„სარკინიგზო და სატრანსპორტო სექტორის შემდგომი განვითარების, ასევე საქართველოს სატრანზიტო პოტენციალის გაუმჯობესების მიზნით, საქართველო აქტიურად არის ჩართული სხვადასხვა რეგიონალურ და საერთაშორისო დერეფნებსა და ინიციატივებში, რომელთაგან ერთ-ერთ მთავარ პრიორიტეტს წარმოადგენს ე.წ. შუა დერეფნის განვითარება, რომლის საშუალებითაც საქართველოს გავლით შესაძლებელია ევროპასა და აზიას შორის ტვირთის ტრანსპორტირება," - განაცხადა გურამ გურამიშვილმა. 

მინისტრის მოადგილის ინფორმაციით, საქართველოს უკვე დაწყებული აქვს ასოცირების შესახებ შეთანხმებით ნაკისრი ვალდებულებების შესრულება, რომელიც რკინიგზის სფეროში სამართლებრივი ბაზის განვითარებას შეეხება. კერძოდ, უკვე განხორციელდა გარკვეული ცვლილებები საქართველოს სარკინიგზო კოდექსში, ასევე მომზადებულია რამდენიმე სამართლებრივი აქტის ცვლილების პროექტი. 
ევროკავშირის მხარდაჭერით მიმდინარე პროექტი ორიენტირებულია ასოცირების შეთანხმებით გათვალისწინებულ იმ ძირითად სამართლებრივ აქტებზე, რომლებიც შეეხება ევროპის ერთიანი სარკინიგზო სივრცის ფორმირებას, სარკინიგზო უსაფრთხოებას და ურთიერთთავსებადობას და რომელთა იმპლემენტაცია საქართველოს სარკინიგზო დარგის მნიშვნელოვან რეფორმირებასთან არის დაკავშირებული. პროექტი ხორციელდება პოლონეთის ინფრასტრუქტურის სამინისტროს მიერ პოლონეთის სარკინიგზო ბაზრის ყველაზე მნიშვნელოვან ინსტიტუციებთან ერთად.

---

ავტორი: NS (სტატია დაფინანსებულია),

---

დღის თემა

მთავარი თემა

ინტერვიუ - ექსკლუზივი