2018-06-08 16:07:33, 10571 ნახვა

---

სახელმწიფო პროგრამის „გადაიღე საქართველოში“ სტენდი საფრანგეთში ანიმაციის ყველაზე მასშტაბურ მარკეტზე იქნება წარმოდგენილი

საქართველოს ეკონომიკისა და მდგრადი განვითარების სამინისტროს სააგენტოს „აწარმოე საქართველოში“ ორგანიზებით, 11-დან 16 ივნისის ჩათვლით პროგრამის „გადაიღე საქართველოში“ სტენდი საფრანგეთში, ანესიში, ანიმაციის ყველაზე მასშტაბურ მარკეტზე - The International Animation Film Market იქნება წარმოდგენილი.

ევროპის მასშტაბით უდიდეს ღონისძიებაზე, რომელიც მსოფლიოს 87 ქვეყნიდან 115 000-ზე მეტ ანიმატორსა და ანიმაციის სფეროში მოღვაწე წარმომადგენლებს უყრის თავს, საქართველოს, როგორც აღმოსავლეთ ევროპის კინოგადაღების მოედნის პოპულარიზაციის მიზნით, წარმოდგენილია კინოინდუსტრიის ხელშეწყობის პროგრამის საინფორმაციო სტენდი, სადაც ნებისმიერ დაინტერესებულ პირს საშუალება ექნება მიიღოს ამომწურავი ინფორმაცია ე.წ „cash rebate” მექანიზმის შესახებ. ამასთანავე, ღონისძიების ფარგლებში, პროგრამის წარმომადგენლები ინდივიდუალურ შეხვედრებს გამართავენ მსოფლიოს მასშტაბით წამყვან ანიმატორებთან და ანიმაციურ კომპანიებთან, რაც ხელს შეუწყობს საქართველოს კინოგადაღების პოტენციალის პოპულარიზაციას.

შეგახსენებთ, რომ კინოინდუსტრიის წახალისების კომპონენტს ახორციელებს საქართველოს ეკონომიკისა და მდგრადი განვითარების სამინისტროს სააგენტო „აწარმოე საქართველოში“ კულტურისა და ძეგლთა დაცვის სამინისტროს ეროვნულ კინოცენტრთან თანამშრომლობით.

2018 წლის მაისის თვის მონაცემებით, პროგრამის „გადაიღე საქართველოში“ ფარგლებში შემოსულია 15 განაცხადი, საიდანაც გადაღებები უკვე დასრულდა 9 ფილმზე, დამატებით 6 ფილმზე კი გადაღებები მალე დაიწყება. აღნიშნული პროექტების განხორციელების შედეგად საქართველოში ჯამურად 26  მილიონ ლარზე მეტი დაიხარჯება, გადაღებებისას კი დასაქმებულთა რაოდენობა 2 000-ზე მეტ ადამიანს შეადგენს.

მნიშვნელოვანია აღინიშნოს, სასიამოვნო წარმატებაც, რომ პროგრამის ფარგლებში 6 პროექტს, რომლებიც პროგრამის ფარგლებში ე.წ cash rebate მექანიზმით სარგებლობდნენ, საქართველოში დახარჯული ბიუჯეტის კვალიფიციური ხარჯების 20% უკვე აუნაზღაურდა. აღნიშნული პროგრამა კი კიდევ უფრო მეტ პროდიუსერს უჩენს ინტერესს გადმოიტანონ კინოწარმოება საქართველოში და დაიბრუნონ კინოგადაღებებზე დახარჯული თანხის ნაწილი.

 

 

(NS)

---

ავტორი: ,

---

დღის თემა

მთავარი თემა

ინტერვიუ - ექსკლუზივი