თბილისის მერმა  კახა კალაძემ  კონფერენციაში „ეთიკა და გამჭვირვალობა ადგილობრივ დონეზე: სტრატეგიები და მექანიზმები“ მიიღო მონაწილეობა.

თბილისის მერიის ინფორმაციით, ღონისძიების ფარგლებში, თბილისის მერმა პირისპირ შეხვედრა ევროპის საბჭოს „ადგილობრივ და რეგიონულ ხელისუფალთა კონგრესის“ გენერალურ მდივან ანდრეას კიფერთან გამართა.

კახა კალაძემ ანდრეას კიფერს კონგრესის საქმიანობისთვის და ადგილობრივი დემოკრატიის განვითარების საქმეში საქართველოს მხარდაჭერისთვის მადლობა გადაუხადა.

კონფერენციაზე კახა კალაძემ მონაწილეებს სიტყვითაც მიმართა და ქალაქის სწორი და ეფექტური განვითარებისთვის ეთიკური და გამჭვირვალე მმართველობის აუცილებლობაზე გაამახვილა ყურადღება.
მისივე თქმით, გამჭვირვალე და პასუხისმგებლიანი მმართველობის მიმართულებით საქართველოს პროგრესი აღსანიშნავია, თუმცა ამ კუთხით გაუმჯობესების შესაძლებლობა კვლავაც არსებობს.

„ადგილობრივ დონეზე ამ პროგრესის ერთ-ერთი ნაწილი საკანონმდებლო რეფორმა იყო. 2015 წლის საკანონმდებლო ცვლილებებით, მნიშვნელოვნად გაიზარდა ადგილობრივი თვითმმართველობების მიერ საჯაროდ სავალდებულო პროაქტიულად გამოსაქვეყნებელი ინფორმაციის ნუსხა. დაწესდა ვადები, როგორც მერთა წლიური ანგარიშების, ასევე გამოთხოვილი  ინფორმაციის მიწოდებისთვის. ეს ცვლილებები ასევე, მოიცავდა სამოქალაქო ჩართულობას - მოქალაქეების აქტიურ მონაწილეობა გადაწყვეტილების მიღების პროცესში. თბილისში მუნიციპალური მომსახურების პროცესი ღიაა. შესყიდვები სრულად გამჭვირვალედ ხორციელდება. მიწოდებული მომსახურებისა და გადაწყვეტილებების  შესახებ ინფორმაციის გამოთხოვა შესაძლებელია ნებისმიერ დროს, ნებისმიერი მოქალაქის მიერ და პასუხის გასაცემად მუნიციპალიტეტს მკაცრი ვადები აქვს დაწესებული. თბილისის მერი ბიუჯეტის თითოეული ლარის დახარჯვის შესახებ ინფორმაციას საზოგადოებას თავად წარუდგენს“, - განაცხადა კახა კალაძემ. 

ღონისძიება ევროკავშირისა და ევროსაბჭოს ეგიდით, „საქართველოს ადგილობრივ თვითმმართველობათა ეროვნულ ასოციაციასთან“ პარტნიორობით ჩატარდა, რომლის მიზანი რეგიონში ადგილობრივი თვითმმართველობისა და ტერიტორიული რეფორმების გაუმჯობესებისათვის, ადგილობრივი დემოკრატიის ხარისხის გაღრმავება და კარგი პრაქტიკის ხელშეწყობაა. 

ორდღიან სამუშაო სესიებში აზერბაიჯანის, ბელარუსის, მოლდოვის, საქართველოს, სომხეთისა და უკრაინის წარმომადგენლები მონაწილეობენ.
 

(NS) 

ავტორი: ,

სოციალური ქსელები

ლექსო ლაშქარავას მკვლელობიდან 5 წელი გავიდა, შემსრულებლები გარეთ არიან, ორგანიზატორები დაუსჯელები

საია: ევროპის საბჭოს კომისარი შეუერთდა საქართველოს „უცხოელი აგენტების“ შესახებ კანონის საქმეს

ჰერჩინსკი - მსოფლიო გამოწვევებთან გამკლავებით, ევროპა მხოლოდ ძლიერდება, საქართველო მათ შორის არ არის

"თეგეტამ" Rainmaking-ისა და Startupbootcamp Georgia-ს ლიდერშიფსერიის პირველ ღონისძიებას უმასპინძლა