„ნაციონალურმა მოძრაობამ“ პარლამენტში მცირე და საშუალო ბიზნესის ხელშეწყობასთან დაკავშირებული კიდევ ორი კანონპროექტი წარადგინა

2017-03-17 11:30:55, 1755 ნახვა

პოლიტიკა

„ერთიანი ნაციონალური მოძრაობის“ საპარლამენტო ფრაქციამ პარლამენტში კიდევ ორი კანონპროექტი წარადგინა, რომელიც მცირე და საშუალო ბიზნესის ხელშეწყობას ითვალისწინებს.

ამის შესახებ დღეს გამართლ ბრიფინგზე პარტიის წევრმა ზურაბ მელიქიშვილმა განაცხადა.

„საკანონმდებლო ცვლილებების პირველი პაკეტი მცირე და საშუალო ბიზნესის დაბეგვრის რეჟიმის გამარტივებას და ბიზნესის დეკრიმინალიზაციას ეხება. შემდგომი, მეორე ეტაპის საკანონმდებლო ინიციატივები მიმართული იქნება საარჩევნო პროგრამის იმ დაპირებების შესასრულებლად, რომელიც გადასახადების შემცირებას, ზედმეტ რეგულაციებზე უარის თქმას, ბიზნესისა და ინვესტიციების დაცულობას ითვალისწინებს.

ჩვენ მიერ წარმოდგენილი კანონპროექტებით 1. გაუქმდება უძრავი ქონების გასხვისებისას ფიზიკური პირების გადასახადისგან განთავისუფლებისთვის ამ ქონების ფლობის ორწლიანი პერიოდი; 2. გაუქმდება ავტოსატრანსპორტო საშუალებისთვის გასხვისებისას ფიზიკური პირების გადასახადისგან განთავისუფლებისთვის ამ ქონების ფლობის ექვსთვიანი პერიოდი.

კანონპროექტები გამომდინარეობენ ნაციონალური მოძრაობის 2016 წლის საარჩევნო პროგრამის ძირითადი იდეებიდან და მიზნად ისახავენ საარჩევნო დაპირებების ხორცშესხმას“, - განაცხადა ზურაბ მელიქიშვილმა.

Patreon P მხარი დაუჭირე "ექსპრესნიუსს" →

ავტორი: ირაკლი მანაგაძე , ექსპრესნიუსის რეპორტიორი 2009 წლიდან