პრეზიდენტის აზრით, კარგი იქნება, თუ მე-9 მოწვევის პარლამენტი დასაქმებულთა უსაფრთხოების საკითხზე იმუშავებს

2016-10-25 15:40:33, 694 ნახვა

პოლიტიკა

პრეზიდენტის პრესსპიკერის ეკა მიშველაძის განცხადებით, სამუშაო ადგილებზე დასაქმებულების უსაფრთხოება, პრეზიდენტის ადმინისტრაციისთვის ძალიან მნიშვნელოვანი საკითხია.

როგორც მიშველაძემ „ექსპრესნიუსის“ კითხვის საპასუხოდ განაცხადა, ამ თემასთან დაკავშირებით, პრეზიდენტის მრჩეველი კახა კოჟორიძე აქტიურად მუშაობდა. პრეზიდენტის პოზიციაა, რომ კარგი იქნება, თუკი მე-9 მოწვევის პარლამენტი შრომის უსაფრთხოების დაცვის კუთხით იმუშავებს:

„ზოგადად, დასაქმებულების უსაფრთხოება ეს არის ძალიან მნიშვნელოვანი საკითხი და, რა თქმა უნდა, ეს არის მნიშვნელოვანი საკითხი ასევე პრეზიდენტის ადმინისტრაციისთვის. ამასთან დაკავშირებით, ძალიან აქტიურად იყო პროცესში ჩართული პრეზიდენტის მრჩეველი კახა კოჟორიძე და ის, რაზეც გააკეთეთ თქვენ მინიშნება, ძალიან კარგი იქნება, თუ ამ საკითხს მიექცევა მეტი ყურადღება, თუ უფრო მეტად იქნება დაცული კანონმდებლობა და თუ ამაზე იზრუნებს მე-9 მოწვევის პარლამენტი“,-აღნიშნა ეკა მიშველაძემ.

შინაგან საქმეთა სამინისტროს ოფიციალური მონაცემებით, 2011-2015 წლებში საწარმოო შემთხვევების შედეგად დაიღუპა 212 და დაშავდა 691 დასაქმებული.

Patreon P მხარი დაუჭირე "ექსპრესნიუსს" →

ავტორი: ირაკლი მანაგაძე , ექსპრესნიუსის რეპორტიორი 2009 წლიდან