ქუმსიშვილი თურქეთის ტრანსპორტის, საზღვაო საქმეთა და კომუნიკაციების მინისტრს შეხვდა

2016-07-19 18:43:26, 1110 ნახვა

ეკონომიკა

საქართველოსა და თურქეთს შორის ტრანსპორტის სფეროში თანამშრომლობის საკითხები განიხილეს საქართველოს პირველმა ვიცე–პრემიერმა, ეკონომიკისა და მდგრადი განვითარების მინისტრმა დიმიტრი ქუმსიშვილმა და თურქეთის ტრანსპორტის, საზღვაო საქმეთა და კომუნიკაციების მინისტრმა აჰმეთ არსლანმა.

ეკონომიკისა და მდგრადი განვითარების სამინისტროდან აცნობეს, შეხვედრაზე დიმიტრი ქუმსიშვილმა თავის თურქ კოლეგას მიუსამძიმრა ბოლო დღეებში თურქეთში განვითარებული მოვლენების დროს დაღუპულთა გამო და განაცხადა, რომ თურქეთის სტაბილურობას უდიდესი მნიშვნელობა აქვს არა მხოლოდ ამ ქვეყნისთვის, არამედ რეგიონული უსაფრთხოებისთვის. თავის მხრივ, თურქეთის მინისტრმა მადლობა გადაუხადა საქართველოს და მის ხალხს თურქეთის მხარდაჭერისთვის.

შეხვედრაზე აღინიშნა, რომ ორ ქვეყანას შორის თანამშრომლობა ტრანსპორტის სფეროში სტაბილურად მზარდი დინამიკით ხასიათდება. ასევე ითქვა, რომ საქართველო და თურქეთი, როგორც ერთიანი სატრანზიტო დერეფნის მონაწილეე ქვეყნები, დაინტერესებულნი არიან სატრანსპორტო სისტემების განვითარებით, რომელიც გაზრდის აღნიშნული დერეფნის გამტარუნარიანობას.

შეხვედრაზე ყურადღება გამახვილდა ტრანსპორტის სექტორის სხვადასხვა სფეროებში არსებულ ვითარებაზე, გამოიკვეთა ის საკითხები, რომლებიც სრულყოფას საჭიროებენ, რათა ორმხრივი თანამშრომლობის სარგებელი ხელსაყრელი იყოს ორივე მხარისთვის.

გამოიკვეთა ის მიმართულებები, სადაც თანამშრომლობა განსაკუთრებით ეფექტიანია, მათ შორის დასახელდა სამოქალაქო ავიაცია. აღინიშნა თურქული ავიაკომპანიების მიერ ორ ქვეყანას შორის გადაყვანილი მგზავრების ზრდის ტენდენცია, რომელიც ბოლო ხუთი წლის განმავლობაში საშუალოდ ყოველწლიურად 18-20%-ით მატულობს.

საუბარი ასევე შეეხო თანამშრომლობას საზღვაო სფეროშიც. გამოითქვა მოსაზრება ქართული საზღვაო დროშით თურქი გემთმფლობელების დაინტერესების შესაძლებლობაზე. ითქვა, რომ ქართული საზღვაო დროშის უპირატესობებს წარმოადგენს თავისუფალი ვაჭრობა ევროკავშირთან და ევროპის თავისუფალ სავაჭრო ზონასთან, ლიბერალური საგადასახადო რეჟიმი, ნულოვანი საშემოსავლო და მოგების გადასახადი გემთფლობელთათვის და სხვა შეღავათები.

შეხვედრაზე მხარეებმა ასევე ისაუბრეს თანამშრომლობის გაღრმავებაზე სხვა სატრანსპორტო მიმართულებებზეც.

დიმიტრი ქუმსიშვილმა თურქეთის ტრანსპორტის მინისტრი აჰმეთ არსლანი ბათუმში საქართველოს პირველ საერთაშორისო საზღვაო ფორუმში მონაწილეობის მისაღებად მიიწვია. ფორუმი სექტემბერში გაიმართება.