რუსეთის მხარემ ჯაშუშობის ბრალდებით დაკავებული საქართველოს კიდევ 3 მოქალაქე გაათავისუფლა

2016-06-06 14:59:54, 703 ნახვა

პოლიტიკა

რამდენიმე დღის წინ, რუსეთის მხარემ ჯაშუშობის ბრალდებით დაკავებული საქართველოს კიდევ სამი მოქალაქე გაათავისუფლა.

ამის შესახებ ჟურნალისტებს პრემიერ-მინისტრის სპეციალურმა წარმომადგენელმა რუსეთთან ურთიერთობის საკითხებში ზურაბ აბაშიძემ განუცხადა.მისივე თქმით, ივნისის თვეში, სავარაუდოდ, საქართველოს კიდევ ერთი მოქალაქე გათავისუფლდება.

„მოგეხსენებათ, პრაღაში ქართულ-რუსული დიალოგის ფარგლებში, ჩვენ განვიხილავთ საკითხს ჩვენი მოქალაქეების გათავისუფლების შესახებ, რომლებიც რუსეთში იხდიდნენ მრავალწლიან სასჯელს ჯაშუშობის ბრალდებით. განვლილ პერიოდში, ჩვენ გავათავისუფლეთ ჩვენი სამი მოქალაქე, რამდენიმე დღის წინ რუსეთის მხარემ დამატებით კიდევ 3 ჩვენი მოქალაქე გაათავისუფლა, რომლებიც უკვე დაუბრუნდნენ ოჯახებს. ამაში მონაწილეობა მიიღო ჩვენმა საგარეო საქმეთა სამინისტრომ, შესაბამისმა უწყებებმა, ალბათ, ივნისის თვეში კიდევ ერთი ჩვენი მოქალაქე გათავისუფლდება, რიგით მე-7. იმედი გვაქვს, რომ ეს თემა, ახლო მომავალში საერთოდ დაიხურება. ამ საკითხს შემდეგ შეხვედრაში პრაღაში კიდევ განვიხილავთ და ბოლო ნაბიჯს გადავდგამთ”,-განაცხადა ზურაბ აბაშიძემ. მან გათავისუფლებულთა გვარების დაკონკრეტებისგან თავი შეიკავა.

„არც ვიცით ამ ხალხს უნდათ თუ არა მათი გვარები ვახსენოთ. ჯაშუშობის ბრალდებით არის ყველა დაკავებული, ვინც გათავისუფლდა. წინა სამი მოქალაქე 2014 წელს გათავისუფლდა. რამდენიმე დარჩა, გაცილებით ნაკლები, ვიდრე გათავისუფლდა”,-აღნიშნა ზურაბ აბაშიძემ.

Patreon P მხარი დაუჭირე "ექსპრესნიუსს" →

ავტორი: ირაკლი მანაგაძე , ექსპრესნიუსის რეპორტიორი 2009 წლიდან