ვაშინგტონში ვიზიტის ფარგლებში, საქართველოს პირველი ვიცე-პრემიერი და ეკონომიკის მინისტრი ლევან დავითაშვილი დონალდ ტრამპის ადმინისტრაციის წარმომადგენელს შეხვდა.

ეკონომიკის სამინისტროს პრესსამსახურის ცნობით, დავითაშვილი თეთრ სახლში აშშ-ის ეროვნული უშიშროების საბჭოს ევროპის უფროს დირექტორს, ენდრიუ პიკს შეხვდა. შეხვედრაში ასევე მონაწილეობდა ეკონომიკის მინისტრის მოადგილე გენადი არველაძე.

ენდრიუ პიკი 2017 წლის დეკემბრიდან 2019 წლის ოქტომბრამდე სახელმწიფო დეპარტამენტის ახლო აღმოსავლეთის საქმეთა ბიუროში ირანისა და ერაყის საკითხებში მდივნის თანაშემწის მოადგილის თანამდებობას იკავებდა, მოგვიანებით კი ეროვნული უშიშროების საბჭოში ევროპისა და რუსეთის საქმეთა უფროსი დირექტორის თანამდებობა დაიკავა, საიდანაც 2020 წლის იანვარში წავიდა. დონალდ ტრამპის თეთრ სახლში დაბრუნების შემდეგ, პიკი ეროვნული უშიშროების საბჭოში ევროპის საკითხებში უფროს დირექტორად დაინიშნა. მიმდინარე წლის მარტში, რიადში, მან მონაწილეობა მიიღო რუსეთის მიერ უკრაინის წინააღმდეგ ომში ცეცხლის შეწყვეტის შესახებ მოლაპარაკებებში.

დავითაშვილის თქმით, ახალი ადმინისტრაციის წარმომადგენლებთან შეხვედრა განსაკუთრებით მნიშვნელოვანი იყო, რადგან „მხარეებმა განიხილეს საქართველოს მთავრობის პრიორიტეტები, რომლებიც სრულად ემთხვევა პრეზიდენტ ტრამპის ხედვას“. მან ხაზი გაუსვა, რომ არსებობს „პოზიციების მჭიდრო თანხვედრა, რაც ორ ქვეყანას შორის თანამშრომლობის გაღრმავების ფართო პერსპექტივებს ხსნის“.

„ქართული ოცნების“ მთავრობის წევრმა სინანული გამოთქვა, რომ წინა ადმინისტრაციის დროს საქართველოსა და შეერთებულ შტატებს შორის სტრატეგიული პარტნიორობა „ფორმალურად შეჩერებული“ იყო. თუმცა, მან აღნიშნა, რომ აშშ-ის ამჟამინდელი ხელმძღვანელობა აჩვენებს „მტკიცე პოზიციას ამ თანამშრომლობის განახლებისა და გაღრმავების საკითხში, რაც ორივე მხარისთვის სასარგებლო იქნება“.

მანამდე დავითაშვილი აშშ-ის სახელმწიფო მდივნის თანაშემწის მოადგილეს, ჯოშუა ჰაკს შეხვდა. მან ასევე შეხვედრები გამართა ვაჭრობისა და ფინანსთა სამინისტროებში, ასევე საერთაშორისო სავალუტო ფონდისა და მსოფლიო ბანკის ხელმძღვანელობასთან.

„ქართული ოცნების“ მიერ რეპრესიული კანონების მიღებისა და 2024 წლის ბოლოს თბილისში აქციების დარბევის შემდეგ, ბაიდენის ადმინისტრაციამ მმართველი პარტიის საპატიო თავმჯდომარეს, ბიძინა ივანიშვილს ფინანსური სანქციები დაუწესა „რუსეთის ფედერაციის ინტერესებიდან გამომდინარე საქართველოს დემოკრატიული და ევროატლანტიკური მომავლის შელახვისთვის“.

ავტორი: ექსპრესნიუსი,

სოციალური ქსელები

პოლონეთმა ზელენსკის მიერ დაბრუნებული „თეთრი არწივის ორდენის“ მიღება დაადასტურა

გვარამია ენმ-ზე - ხალხი ერთ პარტიაშია და ბრიფინგებით, სატელევიზიო ეთერებით და სტატუსებით ელაპარაკება ერთმანეთს და წყევლის და აგინებს

მოქალაქეების 71% მხარს უჭერს ქვეყნის ევროკავშირში გაწევრიანებას, თუმცა 49% მიიჩნევს, რომ საქართველო ევროინტეგრაციის პროცესში არასწორი მიმართულებით მიდის

ლელო: სააკაშვილის განცხადება პოლიტიკური განხეთქილების შექმნის მცდელობაა