2022-09-15 19:07:49, 977 ნახვა

---

ლელო - კობახიძის განცხადებები ზიანს აყენებს საქართველოს სახელმწიფო ინტერესებს და ტერიტორიული მთლიანობის პრინციპს

კობახიძის განცხადებები ზიანს აყენებს საქართველოს სახელმწიფო ინტერესებს და ტერიტორიული მთლიანობის პრინციპს. - ამის შესახებ პარტია „ლელომ“ განაცხადა.

მათივე თქმით, დღეს ქვეყნის მმართველი პარტია ოკუპირებულ რეგიონებს დამოუკიდებელ სახელმწიფოებს ადარებს და საქართველოს რეგიონების ოკუპაციაში რუსეთის, როგორც აგრესორი და ოკუპანტი სახელმწიფოს როლის განეიტრალებას ცდილობს.

"პოლიტიკური გაერთიანება "ლელო-საქართველოსთვის" მიიჩნევს, რომ მმართველი პარტიის - "ქართული ოცნების“ თავმჯდომარის, ირაკლი კობახიძის მიერ საჯაროდ გაკეთებული განცხადებები ხელშესახებ ზიანს აყენებს საქართველოს სახელმწიფო ინტერესებს, ეხმიანება რუსულ პროპაგანდისტულ გზავნილებს და საფრთხეს უქმნის ჩვენი ქვეყნის ტერიტორიული მთლიანობის პრინციპის საერთაშორისო აღიარებას.
კერძოდ, საქართველოს ტერიტორიული მთლიანობის უარყოფის ფაქტად შეიძლება ჩაითვალოს მისი განცხადება, რომელშიც ის რუსეთის საოკუპაციო რეჟიმის მიერ კონტროლირებად სეპარატისტულ რეგიონებს, უკრაინის სუვერენულ სახელმწიფოს ადარებს. 
ამავე დროს, მმართველი პარტიის თავმჯდომარე იმეორებს კრემლის მიერ დამუშავებულ გზავნილს, რომლის თანახმადაც, რუსეთის როლი, საქართველოს სუვერენულ ტერიტორიაზე წარმოქმნილ კონფლიქტებში, ნეიტრალური იყო, ხოლო 2008 წელს, რუსეთის სამხედრო მოქმედებები უკავშირდებოდა მხოლოდ მის მცდელობას აგრესიისგან დაეცვა ეთნიკური ოსები და საკუთარი სამშვიდობო ძალები.
ჩვენი პოზიციაა, რომ დღეს ჩვენს ეთნიკურად აფხაზ და ოს თანამოქალაქეებსაც საოკუპაციო რეჟიმის ქვეშ უწევთ ცხოვრება და არავითარი გავლენა არ გააჩნიათ საკუთარ პოლიტიკურ ბედზე. მხოლოდ საქართველოს მიერ წარმოებული დეოკუპაციის მშვიდობიანი და ეფექტიანი სტრატეგიის პირობებშია შესაძლებელი მათ მიერ დემოკრატიული თავისუფლების მოპოვება, ერთიანი ქართული სახელმწიფოს სუვერენულ საზღვრებში. 
ეს ამოცანა მოითხოვს, როგორც საერთაშორისო ჩართულობის გაზრდის უზრუნველყოფას, რუსეთის გავლენის შესამცირებლად, ასევე, პირდაპირი დიალოგის პოლიტიკის გატარებას ოკუპირებულ ტერიტორიებზე მცხოვრებ თანამოქალაქეებთან. ნაცვლად ამისა, დღეს ქვეყნის მმართველი პარტია ოკუპირებულ რეგიონებს დამოუკიდებელ სახელმწიფოებს ადარებს და საქართველოს რეგიონების ოკუპაციაში რუსეთის, როგორც აგრესორი და ოკუპანტი სახელმწიფოს როლის განეიტრალებას ცდილობს.
აქვე გვსურს აღვნიშნოთ, რომ კობახიძის განცხადება საქართველოს მიერ ომში ჩართვის შესახებ პლებისციტის ჩატარებასთან დაკავშირებით, იმ მტრული და ანტი-სახელმწიფოებრივი რიტორიკის გაგრძელებაა, რომელსაც „ქართული ოცნება“ თანმიმდევრულად ეწევა ბოლო წლების განმავლობაში. აღსანიშნავია, რომ ომში ჩართვისა და „მეორე ფრონტის გახსნის“ თაობაზე დღევანდელ საქართველოში მხოლოდ ერთი პოლიტიკური ძალა საუბრობს - „ქართული ოცნება“.
ომის შიშის დათესვის გზით, „ქართული ოცნება“ ცდილობს საზოგადოებაში არსებული ლეგიტიმური კითხვებისთვის თავის არიდებას, მათ შორის, ისეთ რეალურ პრობლემებზე, როგორიცაა ეროვნული უსაფრთხოების, თავდაცვისუნარიანობის და რუსეთიდან მომდინარე გაზრდილი საფრთხეების, მათ შორის მიგრაციის, საკითხებზე.
პოზიცია, რომელიც უკანასკნელ დღეებში ჟღერდება, კიდევ ერთხელ ადასტურებს, რომ ჩვენი ქვეყნის სუვერენული ინტერესების დასაცავად, ჩვენი ევროპული მომავლის უზრუნველსაყოფად და ქართული სახელმწიფოს გასაერთიანებლად მშვიდობიანი და თანმიმდევრული სტრატეგიის განსახორციელებლად, ‘ქართული ოცნების’ ოლიგარქიული რეჟიმის მმართველობის დასრულება გადაუდებელ ამოცანას წარმოადგენს". - ნათქვამია განცხადებაში.

შეგახსენებთ, რომ ბოლო დღეების განმავლობაში "ქართული ოცნების" ლიდერები ორაზროვან განცხადებებს აკეთებენ ევროპარლამენტარებთან და საქართველოში აშშ-ს საელჩოსთან მიმართებაში, ასევე აღსანიშნავია მმართველი პარტიიდან წასული სამი დეპუტატის - ხუნდაძის, ყაველაშვილისა და სუბარის განცხადებები.

---

ავტორი: ექსპრესნიუსი,

---

დღის თემა

მთავარი თემა

ინტერვიუ - ექსკლუზივი