2019-12-20 18:21:41, 2520 ნახვა

---

მდინარაძე: გაფრინდაშვილი ოკუპაციის მსხვერპლია - დღევანდელი გადაწყვეტილება არანაირ სამართლის ნორმებსა და მორალში არ ჯდება

„უნდა გავაგრძელოთ ძალისხმევა საერთაშორისო პარტნიორებთან ერთად, რომ მაქსიმალურად უზრუნველვყოთ ვაჟა გაფრინდაშვილის გათავისუფლება. არ მგონია, ექიმი ამ ხნის განმავლობაში დარჩეს საპატიმროში“,- ამის შესახებ საქართველოს პარლამენტის თავმჯდომარის მოადგილემ, მამუკა მდინარაძემ ტელეკომპანია „იმედის“ პირდაპირ ეთერში განაცხადა.

მდინარაძე ოკუპირებული ცხინვალის ე.წ სასამართლოს მიერ ქართველი ექიმის, ვაჟა გაფრინდაშვილისთვის 1 წლითა და 9 თვით პატიმრობის შეფარდებას არალეგიტიმური უწოდა.

პარლამენტის ვიცესპიკერის თქმით, ამ განაჩენით, საოკუპაციო რეჟიმი სჯის ადამიანს, რომელმაც სწორი მოქალაქეობრივი პოზიცია დაიკავა.

„ვაჟა გაფრინდაშვილი არის ოკუპაციის მსხვერპლი და არის ადამიანი, რომელიც ისჯება, ალბათობის ძალიან მაღალი ხარისხით, იმ სიტყვებისთვის, იმ ჩვენებისთვის, რომელიც საოკუპაციო რეჟიმის არალეგიტიმურ სასამართლოს თუ გამოძიებას მისცა,  რომ მას არანაირი საზღვარი არ გადაუკვეთია და საზღვარი ქვეყნის შიგნით ვერ იარსებებს. აქედან გამომდინარე, მარტივია დასკვნები. საოკუპაციო რეჟიმი თავისას ცდილობს, რომ ასეთი სიტყვებისთვის დასაჯოს ადამიანი, რომელმაც დაიჭირა სწორი მოქალაქეობრივი პოზიცია“,- განაცხადა მამუკა მდინარაძემ.

---

ავტორი: ექსპრესნიუსი,

---

დღის თემა

მთავარი თემა

ინტერვიუ - ექსკლუზივი