დიმიტრი შაშკინი: პირველი ისტერიკა, რაც საქართველოს ხელისუფლებას დაემართა, PUMA-ს ტიპის ვერტმფრენები იყო

2015-06-23 18:51:39, 534 ნახვა

პოლიტიკა

"პირველი ისტერიკა, რაც დაემართა საქართველოს ხელისუფლებას, იყო სწორედ ფრანგული წარმოების PUMA-ს ტიპის ვერტმფრენები",-ამის შესახებ საქართველოს თავდაცვის ყოფილმა მინისტრმა დიმიტრი შაშკინმა განაცხადა.
მისივე თქმით, აღსანიშნავია ის ფაქტი, რომ PUMA-ს ტიპის ვერტმფრენები კრედიტში იყიდეს და მათ მფრინავების, ელექტრიკოსებისა და მექანიკოსების გადამზადების პაკეტი მოჰყვებოდა.
"პირველი ისტერიკა, რაც დაემართა ახალ ხელისუფლებას, როდესაც თავდაცვის სამინისტროში შევიდნენ, იყო ზუსტად ეს ვერტმფრენები, როცა დაინახეს ფრანგული წარმოების ვერტმფრენები.საუბარი იყო, რომ რატომ არის ასეთი ფუფუნების ვერტმფრენები საქართველოში.ეს იგივეა, რომ შეადაროთ "ნივა" და "ჰამერი" ახალი მანქნანა ამერიკული წარმოების. ამიტომ იყო ჩამოყვანილი ეს "სუპერ პუმები", რომელიც ჩვენ ვიყიდეთ კრედიტში.ამ 4 ვერტმფრენს მოყვებოდა პაკეტები - მფრინავების, ელექტრიკოსების და მექანიკოსების გადამზადება. ახალმა მთავრობამ ეს პაკეტი გააჩერა, ანუ ის ხალხი, რომელიც ამ ვერტმფრენებს უნდა მოემსახუროს, ჩვენ ახლა არ გვყავს",-აღნიშნა დიმიტრი შაშკინმა "კურიერთან" საუბრისას.
თავდაცვის უწყების ყოფილი ხელმძღვანელის ინფორმაციით, PUMA-ს ტიპის ვერტმფრენებს შეუძლია ღამით, წყლიდან, მაღალი მთიდან ადამიანების ევაკუაცია და სამაშველო ღონისძიებებისთვის ეს ვერტმფრენები ძალიან მნიშვნელოვანია. შაშკინის განცხადებით, ხელისუფლებამ იმთავითვე იცოდა, რომ ხსენებულ ვერმტფრენებს ვერ გაყიდდა. "რუსთავი2"-თან საუბარში შაშკინი ამბობს, რომ ისინი შეიცავდა სახელმწიფო საიდუმლოებას, მათ შორის, საფრანგეთის სახელმწიფოსასაც.
ცნობისთვის, შინაგან საქმეთა მინისტრმა ვახტანგ გომელაურმა დღეს განაცხადა, რომ PUMA-ს ტიპის ფრანგული ვერტმფრენები მის უწყებას გადაეცემა. გომელაურის თქმით, ამ საკითხზე გადაწყვეტილება უკვე მიღებულია და ახლა შსს-სა და ეკონომიკის სამინისტროს შორის ვერტმფრენების გადასაცემად შესაბამისი სამუშაოები მიმდინარეობს.