ციფრული ეკონომიკის განვითარებაში ფინანსთა სამინისტრო იქნება ერთ-ერთი წამყვანი უწყება, - ამის შესახებ ფინანსთა მინისტრობის კანდიდატმა, ივანე მაჭავარიანმა დღეს, მთავრობის განახლებული შემადგენლობის წარდგენისას განაცხადა.

მან მადლობა გადაუხადა ქვეყნის პრემიერმინისტრს და მმართველ გუნდს გამოცხადებული ნდობისთვის და ისაუბრა დაგეგმილ რეფორმებსა და პრიორიტეტებზე, იმ როლზე, რომელსაც ფინანსთა სამინისტრო შეასრულებს ციფრული ეკონომიკისა და თანამედროვე ტექნოლოგიების დანერგვის მიმართულებით.

„ფინანსთა სამინისტრო წამყვან როლს შეასრულებს იმ რეფორმების განხორციელებაში, რომელზეც პრემიერ-მინისტრმა ისაუბრა. პირველ რიგში, ეს არის მცირე მთავრობის კონცეფციის დანერგვა და ეკონომიკის ინკლუზიურობა.  პირველი, რასაკვირველია, ხარჯების შემცირებასთან ერთად, პროცესების ოპტიმიზაციას და ბიუროკრატიის შემცირებას ნიშნავს. ეს დღევანდელ დღეს, პრაქტიკულად, შეუძლებელია პროცესების გაციფრულების გარეშე. ჩვენ მიგვაჩნია, რომ ფინანსთა სამინისტრო ერთ-ერთი წამყვანი უწყება იქნება ამ პროცესში", - განაცხადა ივანე მაჭავარიანმა.

ფინანსთა მინისტრობის კანდიდატმა, ასევე, ისაუბრა ეკონომიკის ინკლუზიურობის მნიშვნელობაზე და აღნიშნა, რომ ფინანსთა სამინისტროს პრიორიტეტებში ამ მიმართულებითაც დაგეგმილია ინიციატივები.

„რაც შეეხება ეკონომიკის ინკლუზიურობას, პრიორიტეტი, რომელიც მთავრობის და პრემიერ-მინისტრის მხრიდან არის გაცხადებული, თავის თავში მოიცავს ყველა იმ სიკეთის, რომელიც დღეს ჩვენ გაგვაჩნია, უფრო სამართლიან განაწილებას და პრაქტიკულად თითოეულ მოსახლემდე მიტანას. ეს მიმართულებაც რასაკვირველია, აისახება ფინანსთა სამინისტროს პრიორიტეტებში და თქვენ მალე გექნებათ შესაძლებლობა, იხილოთ ის ინიციატივები, რომლებიც ამ კუთხით იქნება წარმოდგენილი. როგორც პრემიერ-მინისტრმა აღნიშნა,  ყველ რეფორმა 2018-2019 წლებში დაინერგება.  რეფორმების ნაწილი უკვე დაწყებულია და 2019 წლის ბოლომდე, ძირითადად, ჩაშვებული უნდა იყოს ეს პროცესები და ზოგიერთი დამთავრებულიც", - აღნიშნა ფინანსთა მინისტრობის კანდიდატმა, ივანე მაჭავარიანმა.

ავტორი: ,

სოციალური ქსელები

კობახიძემ თინათინ რუხაძის და მისი მოადგილის გათავისუფლების შესახებ ბრძანება გამოსცა

სუს-მა ცეცხლსასროლი იარაღისა და საბრძოლო მასალის მართლსაწინააღმდეგო გასაღების ფაქტზე უცხო ქვეყნის მსხვილი კრიმინალური დაჯგუფების სამი წევრი დააკა

საგარეო მიესალმება ნაურუს მიერ ოკუპირებულ ცხინვალთან და აფხაზეთთან დიპლომატიური ურთიერთობების გაუქმებას

კუპრაძე - არაბული ინვესტიციები, რეალურად, არ არსებობს