ზურაბ პატარაძემ დღეს სოფელ ახოში განახლებული სკოლა გახსნა

2017-09-15 13:32:41, 853 ნახვა

რეგიონი

აჭარის მთავრობის თავმჯდომარემ ზურაბ პატარაძემ დღეს ქედის მუნიციპალიტეტის სოფელ ახოში განახლებული სკოლა გახსნა.

მთავრობის თავმჯდომარესთან ერთად სკოლის გახსნა ადგილობრივ მოსწავლეებს რეგიონის განათლების მინისტრმა ინგა შამილიშვილმა და მუნიციპალიტეტის გამგებელმა დავით დუმბაძემ მიულოცა.

საზეიმო გახსნის შემდეგ ზურაბ პატარაძემ ახალი სასწავლო წლის დაწყება პირველკლასელებთან ერთად სკოლის ყველა მოსწავლეს, მშობელს და პედაგოგს მიულოცა. მთავრობის თავმჯდომარემ სრულად რეაბილიტირებული სკოლის საკლასო ოთახები დაათვალიერა. როგორც ზურაბ პატარაძემ აღნიშნა, განსაკუთრებით სასიხარულოა ზემომთიან აჭარაში სკოლების რებილიტაციისა და მშენებლობის საკითხი, რაც ხელს უწყობს მთაში მოსახლეობის დამაგრებას და მათი პირობების გაუმჯობესებას.

მაღალმთიან ქედაში მდებარე ახოს სკოლა აჭარის განათლების, სპორტისა და კულტურის სამინისტროს ქვეპროგრამის „საჯარო სკოლების ინფრასტრუქტურის გაუმჯობესება" ფარგლებში განახლდა. სკოლის სრული რეაბილიტაციისთვის ახოს საჯარო სკოლის რეაბილიტაციისთვის 380 000 ლარი გაიხარჯა. სკოლის რეკონსტრუქცია-რეაბილიტაციის ფარგლებში შეიცვალა იატაკები, კარ-ფანჯრები და სახურავი. პროექტის მიხედვით განხორციელდა ელქტროტექნიკური, წყალ-კანალიზაციის, სახანძრო სისტემის და ცენტრალური გათბობის მოწყობის სამუშაოები.

სკოლაში 67 მოსწავლესთან 17 პედაგოგი მუშაობს.

აჭარაში წელს 5383 პირველკლასელი დარეგისტრირდა. აჭარის მთავრობის მხარდაჭერით, ახალ სასწავლო წელს გაიხსნება 2 ახალაშენებული სკოლა ხულოს მუნიციპალიტეტის სოფელ აგარასა და შუახევის მუნიციპალიტეტის სოფელ ფურტიოში;

2017 წელს დაიწყო და 2018 წელს დასრულდება 5 ახალი საჯარო სკოლის მშენებლობა (ტუნაძეები, მაწყვალთა, ბათუმის N23, სარფი და განახლება). 2017 წელს სრული და ნაწილობრივი რეაბილიტაცია ჩაუტარდება 24 საჯარო სკოლას.

(NS)