დიმიტრი ქუმსიშვილი: კერძო და საჯარო პარტნიორობის (PPP) შესახებ კანონზე მუშაობა აქტიურ ფაზაშია

2017-04-13 16:22:58, 1924 ნახვა

პოლიტიკა

პირველი ვიცე-პრემიერის, ფინანსთა მინისტრის, დიმიტრი ქუმსიშვილის განცხადებით, ფინანსთა სამინისტრო ეკონომიკისა და მდგრადი განვითარების სამინისტროსთან ერთად, აქტიურად მუშაობს კერძო და საჯარო პარტნიორობის (PPP) შესახებ კანონზე.

მისი თქმით, აღნიშნული მიმართულებით, ასევე, ინტენსიური თანამშრომლობა მიმდინარეობს სავალუტო ფონდის ტექნიკურ მისიასთან, ევროპის რეკონსტრუქციისა და განვითარების ბანკთან, აზიის განვითარების ბანკთან.

„ეს არის ახალი შესაძლებლობები კერძო და საჯარო სექტორისთვის ინვესტიციების განხორციელების მიმართულებით. ეს არის შესაძლებლობა უკეთესი სერვისის შეთავაზების კერძო სექტორის ჩართულობით. კანონი ძალიან სასარგებლო იქნება ჩვენი ქვეყნისთვის. დოკუმენტი მნიშვნელოვანია, მათ შორის, ენერგეტიკის სფეროს განვითარებისთვის, რადგან გარანტირებული შესყიდვის ხელშეკრულებები აღნიშნული კანონის ქვემდებარე იქნება და შესაბამისად, ამ კანონით დარეგულირდება“, - განაცხადა დიმიტრი ქუმსიშვილმა.

მისი თქმით, კანონის გარდა, შესაქმნელია რამდენიმე განმახორციელებელი სტრუქტურა, გარდა ამისა, სამინისტროებში, მათ შორის, ფინანსთა სამინისტროში, გასაძლიერებელია ფისკალური რისკების მართვის მიმართულება.

როგორც ფინანსთა მინისტრმა აღნიშნა, კანონის პროექტის წარდგენა პარლამენტში მიმდინარე წლის ივნისში, ხოლო სტრუქტურების შექმნა და გაძლიერება 2018 წლის 1 იანვრისთვის იგეგმება.

(NS)

Patreon P მხარი დაუჭირე "ექსპრესნიუსს" →

ავტორი: ირაკლი მანაგაძე , ექსპრესნიუსის რეპორტიორი 2009 წლიდან