ჟურნალისტი, საყდრისის მცველი ნინო მიქიაშვილი კომპანია „RMG Gold”–ზე პრემიერ–მინისტრი  ირაკლი ღარიბაშვილის დღევანდელ განცხადებას ეხმაურება, რომლის თანახმადაც ამ საწარმოსთან მიმართებაში  განვითარებულ მოვლენებზე  სამართალდამცავი ორგანოები უნდა დაინტერესდნენ. 

როგორც მიქიაშვილი "ექსპრესნიუსთან" საუბარში ამბობს,  თუ სამართალდამცავები საყდრისთან დაკავშირებით  მისი საქმიანობით მართლაც დაინტერესდებიან, მოხარული იქნება.  რადგან, მისივე თქმით : „ეგებ ასე მაინც მოექცეს მათი ყურადღების არეალში ჩემი სარჩელები“. 

„ბატონო პრემიერ-მინისტრო, საყდრისის უძველეს ოქროს მაღაროსთან და კომპანია "არემჯი გოლდთან" დაკავშირებით თქვენი ყველა გამონათქვამი, ისევე, როგორც სხვების, ჩემს არქივში მაქვს შენახული. ვფიქრობ (უფრო სწორედ, მინდა რომ ასე იყოს) უფრო მოზომილი და ქვეყნის წარსულსა და ამავდროულად მომავალზე ორიენტირებული იქნებოდა თქვენი გამონათქვამები, ასაკით უფრო დიდი, რომ იყოთ და ცხოვრებაში უფრო მეტი, რომ გქონდეთ ნანახი.
არ ვიცი მიგულისხმეთ თუ არა დივერსანტებში და საერთოდ, იცით თუ არა ჩემი არსებობა - მე გახლავართ ერთ-ერთი ადამიანი, ვინც ცდილობს "არემჯი გოლდს" დღეს უკვე სამართლებრივად შეუშალოს ხელი მსოფლიო მნიშვნელობის კულტურული მემკვიდრეობის განადგურებაში.
თქვენი განცხადების წაკითხვისას ვის რა გრძნობა და განცდა დაეუფლა, არ ვიცი, მაგრამ მე ჩემი თავი ამოვიცანი.
მოხარული ვიქნები, თუ სამართალდამცავები საყდრისთან მიმართებაში ჩემი საქმიანობით ახლა მაინც დაინტერესდებიან - ეგებ ასე მაინც მოექცეს მათი ყურადღების არეალში ჩემი სარჩელები, განცხადებები, საჩივრები.
დღეს "ობიექტივში", 15:30 წუთზე სწორედ საყდრისზე გვქონდა გადაცემა და ამის გამო ჩანთაში მედო პროკურატურაში შეტანილი ჩემი საჩივრები, განცხადებები, რომელთა შორის თქვენს წინააღმდეგ შეტანილი საჩივრებიც არის, ბატონო პრემიერ-მინისტრო, უფლებამოსილების გადამეტების ფაქტზე.
მთავარ პროკურორს უკვე ორჯერ ვთხოვე (მამუკა ნოზაძესთან ერთად) გამოძიების დაწყება. პირველად მივმართე 2014 წლსი 29 დეკემბერს (KAO113762210845514), ხოლო მეორედ 2015 წლის 12 იანვარს (N01/13-2648).
2015 წლის 13 აპრილამდე აქვს საბოლოო ვადა თბილისის სააპელაციო სასამართლოს მოსამართლე თეა ძიმისტარაშვილს, ჩვენს სააპელაციო საჩივარზე. ამ ერთ ადამიანს შეუძლია გააჩეროს "არემჯი გოლდი" საყდრისზე და შეუძლია გახდეს საყდრისის ერთ-ერთი ჯალათი.
დღეს, 2015 წლის 3 აპრილს საქართველოს კულტურული მემკვიდრეობის დაცვის ეროვნული სააგენტოდან მივიღე პასუხი, ჩემს განცხადებაზე და იცით რას ეხება ეს პასუხი?! საყდრისის პერმანენტული აფეთქებების შედეგად, იქვე, დაახლოებით ორმოცდაათ მეტრში არსებული ორი ტაძარი იბზარება, კედლებიდან შენალესი მასალა ცვივა. იმ სამი ათას კაცზე რომ აკეთებთ მუდმივად აქცენტს, ეგებ იქვე ეს ტაძრებიც გაიხსენოთ, კიდევ ის ტაძრები, აბულმუგის ხეობაში "არემჯი გოლდის" აფეთქებების შედეგად რომ ზანზარებს. კარგი იქნება მაგ სამი ათასი კაცის სიასაც თუ გამოითხოვთ. აი, მაშინ დარწმუნდებით, რომ საზოგადოებას არასწორ ინფორმაციას აწვდით.
მიუხედავად თქვენი ამგვარი დამოკიდებულებისა, მე მაინც მივიტან სახელმწიფო კანცელარიაში და თქვენს სახელზე დაწერილ განცხადებასთან ერთად ჩავაბარებ ქართველ და ამერიკელ მკვლევარებზე
დაყრდნობით მომზადებულ ჩემს სტატიას, სათაურით "არემჯი გოლდი" ხალხს წამლავს, ხელისუფლება დუმს". ეს წერილი 2015 წლის 26 თებერვალს გაზეთ "საქართველოს რესპუბლიკაში" გამოქვეყნდა. ჩემს განცხადებაში ეერთადერთი იმას გთხოვთ, რომ დაინტერესდეთ და შესაბამისი რეაგირება მოახდინოთ”, – ნათქვამია მიქიაშვილის განცხადებაში.

ცნობისთვის, დღეს, ირაკლი ღარიბაშვილმა განაცხადა, რომ მთელი ბონლისის რაიონი „RMG Gold“–ის მუშაობაზეა დამოკიდებული, რადგან ამ კომპანიას 3000 ოჯახი ჰყავს დასაქმებული. ხოლო, ის რაც  ბოლნისის საწარმოსთან მიმართებაში მოხდა, ამით სამართალდამცავი ორგანოები უნდა დაინტერესდნენ.

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

სოციალური ქსელები

აზერბაიჯანელმა პოლიტპატიმრებმა ფონ დერ ლაიენს ბაქოში ვიზიტის დროს ადამიანის უფლებების საკითხების წამოჭრისკენ მოუწოდეს

რუსეთის ელიტა ომის ესკალაციისთვის ემზადება უკრაინის მიერ რუსეთის სიღრმეში თავდასხმების შემდეგ - The Washington Post

ცოტნე ივანიშვილი პარლამენტში ცემა-ტყეპაზე - ხელი როგორ მოხვდა, რა ფორმით მოხდა, რა სიძლიერით მოხვდა, ამის ზომვა როგორ უნდა დავიწყოთ?

ოლიგარქის ვაჟს ცოტნე ივანიშვილს ოცნების ახალგაზრდული ორგანიზაცია აბარია და ამბობს რომ პოლიტიკაში ჩართვის ინტერესი არ აქვს