ვახუშტი მენაბდის ინფორმაციით, კომისია შრომითი უფლებების კონსტიტუციური რეგულირების არსებითად ახლებურ ხედვაზე შეთანხმდა

2017-03-15 20:11:32, 1772 ნახვა

საზოგადოება

კონსტიტუციონალისტ ვახუშტი მენაბდის ინფორმაციით, საკონსტიტუციო კომისია შრომითი უფლებების კონსტიტუციური რეგულირების არსებითად ახლებურ ხედვაზე შეთანხმდა.

ამის შესახებ მენაბდე Facebook-ის საკუთარ გვერდზე წერს:

„საკონსტიტუციო კომისიის სხდომაზე მნიშვნელოვანი პროცესი მიმდინარეობს. ახლახანს ფაქტობრივად შევთანხმდით შრომითი უფლებების კონსტიტუციური რეგულირების არსებითად ახლებურ ხედვაზე: 1. კონსტიტუციაში ექსპლიციუტურად ჩაიწერება შრომის უფლება (აქამდე მხოლოდ შრომის თავისუფლება ეწერა და სასამართლოს ინტერპრეტაციის იმედად ვიყავით), რომელიც მოიცავს ამ უფლებების ყველა კომპონენტს; 2. შრომითი პირობების ეფექტური ზედამხედველობა სახელმწიფოს კონსტიტუციური ვალდებულება გახდება; 3. დამოუკიდებელი პროფკავშირების უფლება ასევე გაჩნდება კონსტიტუციაში. ნარჩუნდება აქამდე არსებული უფლებები: შრომის თავისუფლება, გაფიცვის უფლება. სადავო საკითხად რჩება: 32-ე მუხლი (უმუშევრების დასაქმებაში ხელშეწყობა, საარსებო მინიმუმით უზრუნველყოფის პირობების და უმუშევრის სტატუსის განსაზღვრა)“, - წერს ვახუშტი მენაბდე.

ცნობისთვის, პარლამენტში საკონსტიტუციო კომისიის მორიგი სხდომა მიმდინარეობს.