8-10  ივნისს ბათუმში გაეროს ევროპის ეკონომიკური კომისიის (UNECE)  „გარემო ევროპისათვის" რიგით მე-8 გარემოსდაცვითი მინისტერიალი გაიხსნა.

აჭარის მთავრობის ადმინისტრაციის პრესსამსახურის ინფორმაციით, მინისტერიალის ფარგლებში საქართველოში 56 ქვეყნიდან დაახლოებით 600-მდე დელეგატი ჩამოვიდა, რომლებიც გარემოს დაცვისა და ბუნებრივი რესურსების საკითხებზე მუშაობენ. მინისტერიალის ძირითადი თემებია „მწვანე ეკონომიკის განვითარება პან-ევროპულ რეგიონში" და „ჰაერის ხარისხის გაუმჯობესება უკეთესი გარემოსა და ადამიანის ჯანმრთელობისთვის". ამასთან, კონფერენციის ფარგლებში,  მაღალი დონის შეხვედრა გაიმართება თემაზე: „განათლება მდგრადი განვითარებისთვის".

კონფერენციის მონაწილეებს საქართველოს პრემიერ-მინისტრმა გიორგი კვრიკაშვილმა, გაეროს ევროპის ეკონომიკური კომისიის აღმასრულებელმა მდივანმა კრისტიან ბახმა და აჭარის მთავრობის თავმჯდომარემ არჩილ ხაბაძემ სიტყვით მიმართეს.

,,ჩვენთვის უაღრესად მნიშვნელოვანი და სასიხარულო ფაქტია, რომ გარემოს დაცვის სფეროში თანამშრომლობის ერთ-ერთი ყველაზე მაღალი დონის საერთაშორისო კონფერენცია ,,გარემო ევროპისათვის" სწორედ ჩვენს ქალაქში იმართება. ჩვენი ქალაქი ბოლო წლებია პოპულარულ ტურისტულ მიმართულებასთან ერთად სართაშორისო კულტურული, სპორტული თუ სამეცნიერო ღონისძიებების ჩატარების ადგილად იქცა. მჯერა, რომ მინისტერიალის ფარგლებში დაგეგმილი ყველა ღონისძიება წარმატებით ჩატარდება და ბათუმი მომავალშიც დარჩება მსგავსი ღონისძიებების ღირსეული მასპინძელი", - განაცხადა არჩილ ხაბაძემ.

მინისტერიალი „გარემო ევროპისთვის" წარმოადგენს  გაეროსთან არსებული  ევროპის ეკონომიკური კომისიის რეგიონში მდებარე წევრი-სახელმწიფოების უნიკალურ პარტნიორობას. პირველად "გარემო ევროპისთვის" მინისტერიალი 1991 წელს,  ჩეხოსლოვაკიის გარემოს დაცვის სამინისტროს ინიცირებით, ქ. დობრისში ჩატარდა. ამ დროისთვის  სულ 7 კონფერენცია გაიმართა. ჩეხეთის გარდა შეხვედრები გაიმართა  შვეიცარიაში (ლუცერნი, 1993), ბულგარეთში (სოფია, 1995), დანიაში (ორჰუსი, 1998), უკრაინაში (კიევი, 2003), სერბეთსა (ბელგრადი, 2007) და ყაზახეთში (ასტანა, 2011).

კონფერენცია -  „ბათუმი 2016" სასტუმრო „შერატონ ბათუმში" გარემოსა და ბუნებრივი რესურსების დაცვის სამინისტროს ორგანიზებით გაიმართა.

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

სოციალური ქსელები

ინტერნეტ მემი პროტესტად გადაიქცა: „ტარაკნების პარტიამ“ ნიუ დელიში უვადო საპროტესტო აქცია დაიწყო

კობახიძემ უკრაინელ ბავშვებს უმასპინძლა რომლებმაც მამები ომში დაკარგეს

Axios: ტრამპი აღიარებს, რომ „ანკორიჯის სულისკვეთებას“ ტოვებს

ტრამპი ირანზე - შეიძლება დადგეს დრო, როდესაც სამხედრო საშუალებებით მოგვიწევს დავასრულოთ ის, რაც დავიწყეთ