ევროკავშირის ანგარიშის გამოქვეყნებამდე, ბოჭორიშვილი ამ ანგარიშს არასერიოზულს და ტყუილს უწოდებს

2026-06-09 10:37:11, 1731 ნახვა

პოლიტიკა

ივანიშვილის ვიცე-პრემიერმა, საგარეო საქმეთა მინისტრმა, მაკა ბოჭორიშვილმა ჟურნალისტებთან საუბრისას, ევროკავშირის რეზოლუციებსა და ამჟამად მიმდინარე ანგარიშის განხილვაზე ისაუბრა. მინისტრის განცხადებით, ევროპარლამენტში დოკუმენტზე მუშაობის პროცესმა კიდევ ერთხელ დაადასტურა, რომ ამ პროცესს გარკვეული ძალები იყენებენ საქართველოში დღის წესრიგის შესაქმნელად. მისივე თქმით, არც ერთი შესწორება, რომელიც მიზნად ისახავდა დოკუმენტის გაჯანსაღებას, არ იქნა გათვალისწინებული.

"ჩვენ ვნახეთ არაერთი რეზოლუცია. ახლაც ევროპარლამენტი განიხილავს მორიგ ანგარიშს საქართველოს შესახებ. ჩვენ შესაძლებლობა გვქონდა თვალი გვედევნებინა იმ პროცესისთვის, თუ როგორ მიმდინარეობდა ევროპარლამენტში ამ ანგარიშზე მუშაობა. სამწუხაროა, რომ არც ერთი შესწორება, რომელიც მიზნად ისახავდა დოკუმენტის გაჯანსაღებას, სიმართლესთან დაახლოებას, არ იქნა გათვალისწინებული. რაც კიდევ ერთხელ ადასტურებს, რომ ეს არის პროცესი, რომელსაც იყენებენ გარკვეული ძალები მხოლოდ და მხოლოდ იმისთვის, რომ საქართველოში შექმნან რაღაც დღის წესრიგი, რაც ნაკლებად გამოსდით, მაგრამ აზიანებენ მაქსიმალურად ევროკავშირის იმიჯს, პირველ რიგში და ევროკავშირის სახეს. იმდენი არასწორი ინფორმაცია წერია ამ რეზოლუციებში, იმდენად არის დეზინფორმაციული, რომ უბრალოდ შეუძლებელია სერიოზულად მათი აღქმა," - განაცხადა საგარეო უწყების ხელმძღვანელმა.