არასამთავრობოების მიმართვა - უნდა გამოიყოს ზვიად ხარაზიშვილის მიმართ სისხლის სამართლებრივი დევნის დაწყების საჭიროება

2025-02-03 15:35:23, 475 ნახვა

სამართალი

არასამთავრობო სექტორი იმ პოლიციის მაღალჩინოსნების და ნიღბიანი პირების დასჯას მოითხოვს, რომელთაც გუშინ თბილისი მოლთან გამართულ აქციაზე სისხლის სამართლებრივი დანაშაულები ჩაიდინეს. ამის შესახებ საიას ხელმძღვანელმა ნონა ქურდოვანიძემ საგანგებო ბრიფინგზე განაცხადა.

მესამე სექტორი ასევე პროკურატურას და სპეციალურ საგამოძიებო სამსახურს მოუწოდებს, გამოძიება ზვიად ხარაზიშვილის დანაშაულებზეც დაიწყოს.

საიას ხელმძღვანელმა ბრიფინგზე ასევე ყველა იმ დარღვევაზე ისაუბრა, რომელსაც პოლიციის მხრიდან გუშინ ჰქონდა ადგილი.

აღსანიშნავია, რომ საპოლიციო ძალები მთელი საღამოს განმავლობაში ცდილობდნენ, ხელი შეეშალათ მშვიდობიანი დემონსტრანტებისთვის შეკრების უფლების განხორციელებაში. ისინი თვითნებურად აკავებდნენ და ფიზიკურად უსწორდებოდნენ მათ. ამასთან, რამდენიმე ეპიზოდში ადგილი ჰქონდა აქციის მონაწილეთა ისეთ შევიწროებას, რაც ჭყლეტის და ჯანმრთელობის დაზიანების საფრთხეს ქმნიდა. ფიზიკურ ანგარიშსწორებასთან ერთად ცალკეული

სამართალდამცველები სიტყვიერ შეურაცხყოფას აყენებდნენ დემონსტრანტებს, განსაკუთრებით კი ქალებს. დაკავებულთა ნაწილი საუბრობს დაკავების შემდგომ ავტომობილებში პოლიციელების მხრიდან ძალადობაზე და დაშავებულთა შორის არის ჟურნალისტი ნიკო კოკაია. იგი პროფესიული საქმიანობის შესრულებისას დაშავდა და კლინიკაში გადაყვანა გახდა საჭირო.

საჯაროდ გავრცელებული კადრები მოწმობს, რომ შსს მშვიდობიანი დემონსტრანტების მიმართ კვლავ აგრძელებს არასათანადო მოპყრობის პრაქტიკას. ტვ პირველის მიერ გავრცელებული კადრები ადასტურებს, რომ დაკავებულ პირებზე ძალადობაში უშუალოდ მონაწილეობდა ზვიად ხარაზიშვილი, რომელთანაც დაკავებული პირი სამართალდამცავებს მიჰყავთ ფიზიკური ანგარიშსწორებისთვის. ასევე გავრცელდა კადრები, თუ როგორ მიუთითებს აღნიშნული პირი საპოლიციო ძალებს, კამერების წინ მოერიდონ დემონსტრანტებზე ძალადობას.

დაკავებულთა შორის იყო არასრულწლოვანიც, რომელიც რამდენიმე საათის გამავლობაში ისე იმყოფებოდა პოლიციის განყოფილებაში, რომ მასთან ადვოკატს არ ეძლეოდა შეხვედრის შესაძლებლობა. ადვოკატს არ მიეცა დატყვევებულთან კომუნიკაციის შესაძლებლობა გარკვეული დროის განმავლობაში და მხოლოდ მას შემდეგ გახდა ეს შესაძლებელი, როდესაც ის ხელწერილით გამოუშვეს.

დაკავებულთა უმეტესობა ამ დრომდე წინასწარი დაკავების იზოლატორებში იმყოფება. ამ დროისთვის ადვოკატებისთვის უცნობია 24 საათის განმავლობაში გაგრძელდება მათი დაკავება თუ ტრადიციულად იმ მავნე პრაქტიკის გაგრძელება იქნება აქაც, როდესაც შსს დაკავების ვადას მაქსიმალური დროით, 48 საათით აგრძელებს ხოლმე.

ჩვენ მოვუწოდებთ გენერალურ პროკურატურას და სპეციალურ საგამოძიებო სამსახურს, მოახდინოს ამ ფაქტებზე დროული და ეფექტიანი რეაგირება. მათ შორის, უნდა გამოიყოს ზვიად ხარაზიშვილის მიმართ სისხლის სამართლებრივი დევნის დაწყების საჭიროება, რადგან ის უშუალოდ მონაწილეობდა ძალადობაში და ამასთან დაკავშირებით არსებობს შესაბამისი კადრები.

გარდა ამისა, ხშირად საგამოძიებო უწყებები საუბრობენ ხოლმე იმაზე, რომ პოლიციელებს აქვთ ისეთი ჩაცმულობა, უკეთიათ ნიღბები და მათი ამოცნობა ვერ ხერხდება, თუმცა ის კადრები, რომელიც გავრცელდა, იდენტიფიცირებას ახდენს იმ პირებისა, რომლებიც მონაწილეობდნენ ძალადობაში. ამიტომ, მათი სისხლის სამართლებრივი დევნა აუცილებლად უნდა დაიწყოს.

ჩვენ, 13 ორგანიზაციის ადვოკატები, ვაგრძელებთ მუშაობას დაკავებულთა უფლებების დასაცავად, - განაცხადა ნონა ქურდოვანიძემ.