იუკნევიჩიენე - პრეზიდენტი სალომე ზურაბიშვილი არის ევროპული საქართველოს ლიდერი და ახლა ის სტრასბურგში მოემართება

2024-12-17 15:30:00, 446 ნახვა

პოლიტიკა

საქართველოს პრეზიდენტი სალომე ზურაბიშვილი არის ევროპული საქართველოს ლიდერი და ახლა ის სტრასბურგში მოემართება,- ამის შესახებ ლიეტუველმა ევროპარლამენტარმა, რასა იუკნევიჩიენემ ევროპარლამენტში საქართველოს შესახებ გამართულ დებატებზე სიტყვით გამოსვლისას განაცხადა.

იუკნევიჩიენეს თქმით, გამოსავალი მხოლოდ ახალი არჩევნების ჩატარებაა.

„საქართველოს პრეზიდენტი სალომე ზურაბიშვილი არის ევროპული საქართველოს ლიდერი და ახლა ის მოემართება სტრასბურგში, რათა მოგვმართოს ჩვენ, ევროკავშირის დემოკრატიის გულში. არის თუ არა იმედი? ეს არის ყველაზე ხშირი შეკითხვა საქართველოში - დიახ, იმედი არის. როდესაც მე თბილისში ვიყავი გასულ კვირას, ვნახე იმედიანი ხალხი, ევროკავშირის დროშებით, რომლებიც აფრიალებენ ამ დროშებს არა მხოლოდ დედაქალაქში, არამედ მთელ ქვეყანაში. ადამიანები, მათ შორის, ჟურნალისტები, სცემეს, მაგრამ ისინი მაინც გამოდიან დემონსტრაციებზე.

საქართველო არის სახელმძღვანელო იმისა, თუ როგორ ერევა რუსეთი ქვეყნების დემოკრატიულ სისტემებში და როგორ იბრძვის ხალხი, ერთი გასროლის გარეშე. ევროკავშირის ინსტიტუტებმა არ უნდა დახუჭოს თვალი. სახალხო პარტიის პოზიცია არის მკაფიო: არჩევნები იქნა მოპარული და ვერ ვხედავთ სხვა გზა, გარდა იმისა, რომ ახალი არჩევნები გაიმართოს. სალომე ზურაბიშვილი არის ერთადერთი ლეგიტიმურად არჩეული პრეზიდენტი.

ჩვენ მოვუწოდებთ წევრ სახელმწიფოებს, რომ დააწესონ სანქციები იმ ადამიანებზე, ვინც გაყალბებულ არჩევნებსა და ძალადობაზე არიან პასუხისმგებლები.

მოვუწოდებთ წევრი სახელმწიფოების მინისტრებს, რომ ესტუმრონ საქართველოს ევროპული მისიებით.

ჩვენ, მოვუწოდებთ, რომ მივიღოთ გადაწყვეტილებები და არ მივცეთ პუტინს საშუალება, რომ გაანადგუროს კიდევ ერთი დემოკრატია ევროპის კონტინენტზე“,- განაცხადა იუკნევიჩიენემ [სინქრონული თარგმანი].