ტელეკომპანია „ფორმულას“ ერთ-ერთი დამფუძნებელი, რეჟისორი გიორგი ლიფონავა, პარტია „ახალის“ წევრი, ნიუტონის თავისუფალი სკოლის მასწავლებელი ვანო გომურაშვილი და მოქალაქე ბექა კახიძე დროებითი მოთავსების იზოლატორიდან გაათავისუფლეს.

როგორც ადვოკატმა, ლაშა ტყეშელაძემ „TV პირველთან“ საუბრისას განაცხადა, აღნიშნული პირები შინაგან საქმეთა სამინისტრომ უკანონოდ დააკავა.

„48 საათის შემდეგ შსს-მ კეთილი ინება და გამოუშვა უკანონო პატიმრები. ეს ადამიანები უკანონოდ ჰყავდათ დაკავებული... არ არსებობს არავითარი მტკიცებულება. ეს ადამიანები ყოველთვის იცავენ კონსტიტუციას. შსს კი, ყოველთვის იქცევა როგორც კრიმინალი“,- აცხადებს  ტყეშელაძე.

დროებითი მოთავსების იზოლატორის დატოვების შემდეგ მედიასთან კომენტარი გააკეთა გიორგი ლიფონავამ, რომლის თქმითაც, დაჭერებით ცდილობენ, ადამიანების დაშინებას, მაგრამ ამის მიუხედავად, საპროტესტო აქციებში მონაწილეობას მაინც აპირებს.

„განსაკუთრებული მიზეზი არ სჭირდებათ, რომ დაგიჭირონ, როცა აქციაზე ხარ. შეშინების მცდელობაა, მაგრამ ვერავის შეაშინებენ. აქციაზე ვიდგები, ბრძოლა გრძელდება“,- ამბობს ლიფონავა.

რაც შეეხება ვანო გომურაშვილს, „ახალის“ წევრი „ექსპრესნიუსთან“ საუბრისას აცხადებს, რომ დაკავებამდე მას ემუქრებოდნენ.

„ორი დღის განმავლობაში პოლიციელი მემუქრებოდა, რომ დამიჭერდა მაშინ, როდესაც ჩვენ არ გვაძლევდა უნივერსიტეტში შესვლისა და განათლების უფლების გამოყენებას. ამის ლოგიკური შედეგი დადგა ცესკოსთან, როდესაც დაგვიჭირეს და დაგვიჭირეს იმიტომ, რომ ვიცავთ ამ ქვეყნის ევროპულ და დემოკრატიულ მომავალს. მუქარები ისმოდა წინა დღეებში - აი, დღეს ვერ დაგიჭირე და ხვალ დაგიჭერ და მეორე დღესაც, როდესაც ცესკოსთან ვიყავით - აი, დღეს აუცილებლად დაგიჭერთ. ეს იყო წინასწარ განზრახული მუქარა, რომელიც „ქართული ოცნების“ პოლიციამ/მილიციამ აასრულა“,- უთხრა გომურაშვილმა „ექსპრესნიუსს“.

შეგახსენებთ, ტელეკომპანია „ფორმულას“ ერთ-ერთი დამფუძნებელი, რეჟისორი გიორგი ლიფონავა, პარტია „ახალის“ წევრი, ნიუტონის თავისუფალი სკოლის მასწავლებელი ვანო გომურაშვილი და მოქალაქე ბექა კახიძე 16 ნოემბერს დააკავეს. აღნიშნული პირების დაკავება იმ დროს მოხდა, როდესაც საქართველოს ცენტრალურ საარჩევნო კომისიასთან  (ცესკო) შეკრებილი აქციის მონაწილეები, შემაჯამებელი სხდომის დასრულების შემდეგ, აღმაშენებლის ხეივანზე მსვლელობას მართავდნენ.

ავტორი: ექსპრესნიუსი,

სოციალური ქსელები

რუსეთი საწვავის შოკის წინაშე დგას: ბენზინის ფასები ერთ წელიწადში 20%-ით გაიზარდა

„საშინელი და უპრეცედენტო რეკორდი“ - რუსეთის არმიის დანაკარგებმა უკრაინაში 1.4 მილიონს მიაღწია

პროკურატურამ არასრულწლოვანი შვილების მიმართ ჩადენილი ტრეფიკინგის ფაქტზე 3 პირს ბრალდება წარუდგინა

ლაიენი: სამხრეთ კავკასია მსოფლიოს უდიდესი გზაჯვარედინია, სტრატეგიული მნიშვნელობა ზრდას აგრძელებს და აზერბაიჯანს ცენტრალური როლი აქვს