The Times Of Israel - ბლინკენმა G7-ის ლიდერებს უთხრა, რომ ირანმა ისრაელზე თავდასხმა, შესაძლოა, მომდევნო 24-48 საათში განახორციელოს

2024-08-05 11:25:14, 450 ნახვა

მსოფლიო

ამერიკის შეერთებული შტატების სახელმწიფო მდივანმა, ენტონი ბლინკენმა G7-ის ქვეყნების ლიდერებს სატელეფონო საუბრისას განუცხადა, რომ ირანმა ისრაელზე თავდასხმა, შესაძლოა, მომდევნო 24-48 საათის განმავლობაში განახორციელოს. ამის შესახებ The Times Of Israel-ი წერს.

მედიის ცნობით, ბლინკენმა კოლეგებს ასევე უთხრა, რომ ირანის მიერ დაგეგმილი თავდასხმის ზუსტი დრო არ იცის.

სახელმწიფო მდივანმა ოფიციალურ პირებს განუცხადა, რომ რეგიონალური ომის თავიდან ასაცილებლად, თეირანზე ზეწოლა მისი თავდასხმის შეზღუდვისთვის საუკეთესო გზაა.

შეგახსენებთ, ახლო აღმოსავლეთში მზარდი დაძაბულობაა მას შემდეგ, რაც 27 ივლისს, ისრაელის მიერ კონტროლირებად გოლანის მაღლობებზე, ქალაქ მაჯდალ-შამსზე სარაკეტო შეტევა განხორციელდა, რასაც სულ მცირე, 12 ადამიანის სიცოცხლე ემსხვერპლა. ისრაელმა თავდასხმაში ბრალი ლიბანში მოქმედ "ჰეზბოლას" დასდო და საპასუხო ზომებითაც დაიმუქრა. თავად დაჯგუფებამ იერიშთან რამე კავშირი უარყო.

30 ივლისს, ისრაელმა ლიბანის დედაქალაქ ბეირუთზე საჰაერო თავდასხმა განახორციელა, რასაც "ჰეზბოლას" მეთაური ფუად შუქრი ემსხვერპლა.

შუქრის დაღუპვიდან რამდენიმე საათში, ირანის დედაქალაქ თეირანში ტერორისტული დაჯგუფება "ჰამასის" პოლიტიკური ლიდერი ისმაილ ჰანიე მოკლეს, რის შემდეგაც ირანის სულიერმა ლიდერმა, აიათოლა ალი ხამენეიმ განაცხადა, რომ ირანი ისრაელზე "შურს იძიებდა".

Patreon P მხარი დაუჭირე "ექსპრესნიუსს" →

ავტორი: ექსპრესნიუსი,