სახელმწიფო დეპარტამენტმა და აშშ-ის თავდაცვის სამინისტრომ დაადასტურეს, რომ ესპანეთის გამოცემა El País-მა ოთხშაბათს მართლაც გამოაქვეყნა რუსეთის მოთხოვნებზე აშშ-ისა და ნატოს ნამდვილი პასუხების ასლები.

უცნობია თუ როგორ მოხვდა ესპანეთის პრესაში კონფიდენციალური დოკუმენტები, რომლებზეც ამერიკის მხარემ მოსკოვს სთხოვა, რომ არ გამოექვეყნებინა.

რუსეთმა 2021 წლის დეკემბერში გამოაქვეყნა უსაფრთხოების გარანტიების თაობაზე ამერიკის შეერთებულ შტატებთან და ნატოსთან შეთანხმების პროექტები. რუსეთის ერთ-ერთი მოთხოვნაა, რომ აშშ-მა და ნატომ არ დაუშვან აღმოსავლეთით ნატოს შემდგომი გაძლიერება და ალიანსში ყოფილი საბჭოთა რესპუბლიკების მიღება. ასევე, უარი თქვან სამხედრო საქმიანობაზე უკრაინაში, აღმოსავლეთ ევროპის სხვა ქვეყნებში, ამიერკავკასიასა და ცენტრალურ აზიაში.

El País-ში გამოქვეყნებული დოკუმენტების მიხედვით, აშშ და ნატო კვლავ ადასტურებენ, რომ "ღია კარის" პოლიტიკას ემხრობიან - ანუ მზად არ არიან რუსეთს დაუკმაყოფილონ მოთხოვნა, რომ ნატო არ გაფართოვდება აღმოსავლეთის მიმართულებით. აშშ ალიანსის ძალების მოცულობას მიიჩნევს რუსეთის ძალების პროპორციულად და აცხადებს, რომ აღმოსავლეთ ევროპაში არ განათავსებს მოსკოვის შეშფოთების გამომწვევ, დამრტყმელ ჯგუფებს და ბირთვულ შეიარაღებას, ხოლო ალიანსის ძალების გაძლიერებას ვაშინგტონი უკავშირებს რუსეთის სამხედროების კონცენტრაციას უკრაინის საზღვართან. დასავლეთი ასევე უგულებელყოფს მოსკოვის მოთხოვნას, ნატოს ინფრასტრუქტურის განთავსება დაუბრუნდეს 1997 წლის ნიშნულს. ამის შესახებ დოკუმენტში საუბარიც არ არის. აღმოსავლეთ ევროპაში სამხედრო მოქმედებებისგან უარის თქმის მოთხოვნის პასუხად, ნატო ითხოვს "უკრაინის, საქართველოს და მოლდოვის ტერიტორიებიდან ჯარების გაყვანას.

გამოქვეყნებული დოკუმენტების თანახმად, აშშ და ნატო მზად არიან გააგრძელონ რუსეთთან დიალოგი უსაფრთხოებაზე, თუმცა ამის მთავარ პირობად ასახელებენ უკრაინის გარშემო ვითარების დეესკალაციას და უკრაინის საზღვრებიდან რუსეთის ჯარების გაყვანას.  ნატო და აშშ მზად არიან განიხილონ ევროპაში სამხედრო წვრთნების საკითხი. აშშ და ნატო რუსეთს სთავაზობენ დიალოგის გამართვას იარაღის კონტროლის ზომებზე ინციდენტების პრევენციის მიზნით, იმის სანაცვლოდ, რომ ვითარება დეესკალაციას დაექვემდებარება.

ცნობისთვის დოკუმენტები გასულ კვირას გადაეცა რუსეთს. მოსკოვისგან ჯერჯერობით არ ყოფილა ოფიციალური პასუხი, თუმცა რუსეთის პრეზიდენტმა ვლადიმირ პუტინმა სამშაბათს განაცხადა, რომ უკმაყოფილოა აშშ-თი და მისი მოკავშირეებით.

ავტორი: ექსპრესნიუსი,

სოციალური ქსელები

ნაუსედა: ჩვენ გვაქვს სადაზვერვო ინფორმაცია, რომ რუსეთი ლიეტუვის ინფრასტრუქტურაზე თავდასხმებს გეგმავს

დღეს უკრაინის სახელმწიფოებრიობის დღეა - კიევი საერთაშორისო პარტნიორებს მასპინძლობს

ზურა ჯაფარიძეს ავტომობილი დაეჯახა - პოლიტიკოსი კლინიკაშია გადაყვანილი

ქუთაისში, იოსელიანის ქუჩაზე ხარაჩო ჩამოიშალა და მუშა მოიყოლა, ის გარდაიცვალა