2021-11-12 10:58:08, 429 ნახვა

---

რატი ბრეგაძე - მე არასოდეს არცერთ ეთერში არ მითქვამს ტერმინი „შიმშილობის შეწყვეტა“. მე ვთქვი – ის იღებს ნატურალურ წვენებს და სხვადასხვა სახის ფაფებს

იუსტიციის მინისტრის განცხადებით, მას არასდროს უთქვამს არცერთ ეთერში, რომ პატიმარმა სააკაშვილმა შიმშილობა შეწყვიტა. რატი ბრეგაძე განმარტავს, რომ მან მხოლოდ სააკაშვილის მიერ ნატურალური  წვენებისა და სხვადასხვა სახის ფაფების მიღების შესახებ განაცხადა. მისივე თქმით, აღნიშნული ინფორმაცია სადეპუტატო კითხვის პასუხად გასაჯაროვდა, რისი ვალდებულებაც უწყებას ჰქონდა.

„მე არასოდეს არცერთ ეთერში არ მითქვამს ტერმინი „შიმშილობის შეწყვეტა". მე ვთქვი და პასუხისმგებელი ვარ ჩემს ყველა სიტყვაზე. ეს იყო შემდეგი: ის იღებს ნატურალურ   წვენებს და სხვადასხვა სახის ფაფებს. აქვე ვიტყვი, საიდან მოხდა ამ ინფორმაციის გამოტანა. ჩვენ მივიღეთ სადეპუტატო კითხვა, რომელზეც ვალდებული ვიყავით, გვეპასუხა. კითხვა იყო შემდეგნაირად დასმული: ხომ არ იღებს ის რაიმე საკვებ დანამატებს, რასაც შეიძლება ჰქონდეს დადებითი შედეგი შიმშილობისა ეფექტზე?  ბატონმა სარჯველაძემ მოგვმართა ამ კითხვით და ჩვენ, ბუნებრივია, გავეცით პასუხი. თუმცა, ამ პასუხში არ იყო საუბარი იმაზე, შეწყდა თუ არა შიმშილობა. ამ ტერმინზე ჩვენ არ გვქონია აპელირება. მათ სურდათ სტრასბურგში და ჩვენს საერთაშორისო პარტნიორებთან იმის დამტკიცება, რომ, იმის ნაცვლად, რომ ჩვენ მოვუწოდოთ შიმშილობის შეწყვეტისკენ, პირიქით – ვაიძულებთ,  ვაშიმშილოთ. არადა, სწორედ ეს ოპონენტები იყვნენ, რომლებიც ღია ეთერების საშუალებით მოუწოდებდნენ პატიმარს, რომ არ გაებედა შიმშილობის  შეწყვეტა, წინააღმდეგ შემთხვევაში მისი ავტორიტეტი, როგორც პოლიტიკოსისა, განადგურდებოდა", – განაცხადა რატი ბრეგაძემ „რუსთავი 2"-ის პირდაპირ ეთერში.

მისივე განცხადებით, იუსტიციის სამინისტრო სრულად იზიარებს სტრასბურგის სასამართლოს გადაწყვეტილების სულისკვეთებას და სააკაშვილის, ისევე, როგორც სხვა პატიმრების, ჯანმრთელობა და უსაფრთხოება უწყებისთვის მნიშვნელოვანია.

„ჩვენ სრულიად ვიზიარებთ სტრასბურგის სასამართლოს გადაწყვეტილების  სულისკვეთებას და, ბუნებრივია, გვინდა, რომ ეს ადამიანი, ისევე, როგორც ყველა სხვა პატიმარი, იყოს ჯანმრთელი. ყველა პატიმრის ჯანმრთელობა და უსაფრთხოება არის ჩვენი პასუხისმგებლობა და არ უნდა დაგვავიწყდეს, რომ ბატონი სააკაშვილის გარდა 9 ათასზე  მეტი პატიმარი გვყავს და მათაც ვუთმობთ სათანადო ყურადღებას. ყველა პატიმარი კანონის წინაშე თანასწორია", – განაცხადა რატი ბრეგაძემ. 

---

ავტორი: NS (სტატია დაფინანსებულია),

---

დღის თემა

მთავარი თემა

ინტერვიუ - ექსკლუზივი