2021-02-19 10:24:49, 755 ნახვა

---

ნატო-ს საპარლამენტო ასამბლეის პრეზიდენტი - პოლიტიკური ჩიხის გადალახვა საქართველოს ევროატლანტიკური ინტეგრაციისთვის გადამწყვეტია

ამერიკელი კონგრესმენი და NATO-ს საპარლამენტო ასამბლეის პრეზიდენტი ჯერი კონოლი საქართველოში განვითარებულ პოლიტიკურ კრიზისს ეხმაურება.

კონგრესმენი საქართველოს ხელისუფლებასა და ოპოზიციას მაქსიმალური თავშეკავებისკენ და მშვიდობიანი მოლაპარაკებისკენ მოუწოდებს.

„მე მჯერა, რომ საქართველოში ჯანსაღი დემოკრატია ქვეყნის უზარმაზარი პოტენციალის გახსნის ერთადერთი გზაა. სამწუხაროდ, ბოლო დროს განვითარებული პოლიტიკური ტენდენციები, მათ შორის პოლიტიკური პოლარიზაციის გაღრმავება, ეწინააღმდეგება საქართველოს ყველა მოქალაქის ინტერესებისთვის სამართლიანი დემოკრატიის ფუნქციონირებას.

სულ რაღაც ათი დღის წინ, აშშ-ის კონგრესში კვლავ განვაცხადე საქართველოს მხარდაჭერის შესახებ. ეს კანონპროექტი აჩვენებს, რომ შეერთებული შტატები მტკიცედ უჭერს მხარს საქართველოს სუვერენიტეტსა და უსაფრთხოებას, განსაკუთრებით რუსეთის აგრესიის პირობებში. ამასთან, იგი ხაზს უსვამს საქართველოში დემოკრატიული ფასეულობების მუდმივი განვითარების მნიშვნელობას, მათ შორის თავისუფალი და სამართლიანი არჩევნების ჩატარებას, საჯარო სექტორის გამჭვირვალობას და ანგარიშვალდებულებას, კანონის უზენაესობას და ანტიკორუფციულ ძალისხმევას.

გაჭიანურებული პოლიტიკური ჩიხის გადალახვას გადამწყვეტი მნიშვნელობა აქვს საქართველოს დემოკრატიული მომავლისა და ევროატლანტიკური ინტეგრაციისთვის. ამის მიღწევა შესაძლებელია მხოლოდ უმრავლესობასა და ოპოზიციას შორის დიალოგისა და ნდობისთვის აუცილებელი პირობების შექმნით. ნატოს საპარლამენტო ასამბლეა მზად არის გააგრძელოს საქართველოს მხარდაჭერა ამ საქმეში. საერთო დემოკრატიული ღირებულებები როგორც ნატო-ს წევრებს, ისე საქართველოს მსგავს ჩვენს პარტნიორებს შორის, არის ჩვენი უძლიერესი იარაღი მოსკოვში, პეკინსა და სხვაგან ავტოკრატიების წინააღმდეგ“, - აღნიშნულია განცხადებაში.

---

ავტორი: ექსპრესნიუსი,

---

დღის თემა

მთავარი თემა

ინტერვიუ - ექსკლუზივი