პარლამენტში პრეზიდენტის მოტივირებული შენიშვნების სახით ჩამოყალიბებულ კანონპროექტს განიხილავენ

2015-09-02 14:35:14, 420 ნახვა

პოლიტიკა

პარლამენტის სესიაზე ვეტოს საფუძველზე წარდგენილ პრეზიდენტის მოტივირებული შენიშვნების სახით ჩამოყალიბებულ კანონპროექტს განიხილავენ.
როგორც ცნობილია, 31 ივლისს პრეზიდენტმა პარლამენტს ეროვნული ბანკის შესახებ საქართველოს ორგანული კანონი და მისგან გამომდინარე კანონთა პაკეტი უკან დაუბრუნა.
ეროვნული ბანკის შესახებ საქართველოს ორგანული კანონის პროექტზე და მისგან გამომდინარე 13 თანმდევ კანონპროექტზე პრეზიდენტის მოტივირებულ შენიშვნებს კომიტეტის სხდომაზე ამწუთებში პრეზიდენტის მრჩეველი ეკონომიკურ საკითხებში გიორგი აბაშიშვილი წარადგენს.
პრეზიდენტის ადმინისტრაციაში მიზანშეუწონლად მიაჩნიათ საფინანსო სექტორის ზედამხედველობის კუთხით ეროვნული ბანკის უფლებამოსილებების სააგენტოსათვის გადაცემა და სააგენტოს ამოცანად საფინანსო სექტორის ფინანსური მდგრადობისა და გამჭვირვალობის ხელშეწყობის, მომხმარებელთა და ინვესტორთა უფლებების დაცვის განსაზღვრა, ნაცვლად ეროვნული ბანკისა.
ასევე მიიჩნევენ, რომ კანონპროექტის ამოქმედება არსებითად გამოიწვევს ფინანსური სექტორის სტაბილურობის შერყევას, რამაც შესაძლოა მნიშვნელოვანი უარყოფითი გავლენა მოახდინოს ქვეყანაში ფინანსური ინსტიტუტების მდგრადობისა და სანდოობის ხარისხზე.
შესაბამისად, პრეზიდენტის ადმინისტრაცია არ ეთანხმება „საქართველოს ეროვნული ბანკის შესახებ“ საქართველოს ორგანულ კანონში ცვლილების შეტანის თაობაზე“ საქართველოს ორგანული კანონის პროექტის ხელმოსაწერად წარმოდგენილი სახით მიღებას და შემდგომში ამოქმედებას.